O CONCELLO ESTÁ A LEVAR A CABO OBRAS DE MELLORA NAS INSTALACIÓNS DA ESCOLA INFANTIL.

Barreiros, 1 de decembro de 2016. O Concello está a realizar obras de mellora nas instalacións da escola infantil, segundo deu a coñecer o alcalde, Alfonso Fuente.

Os traballos consisten en cubrir o patio e cambiarlle o pavimento, e tamén se adquiriron mobiliario, material didáctico e xogos para os nenos e nenas.

O investimento ascende a máis de 27.000 euros. O Concello conta cunha subvención da Consellería de Política Social e está cofinanciado polo Fondo Europeo de Desenvolvemento Rexional no marco do programa operativo Feder Galicia 2014-2020.

Por outra banda, estes días colocouse unha caldeira de biomasa nos Colexios Vellos de San Miguel de Reinante, proxecto financiado polo INEGA, a través dunha subvención para proxectos de equipamentos térmicos de biomasa, cofinanciados co Fondo Europeo de Desenvolvemento Rexional, no marco do programa operativo Feder-Galicia 2014-2020.

O CONCELLO OBRIGARÁ A UNHA MADEIREIRA A DEIXAR EN PERFECTO ESTADO UNHA ESTRADA NA PARROQUIA DE SAN XUSTO, QUE ESTIVERON A EMPREGAR PARA EXTRAER A MADEIRA DO MONTE. FUENTE PARGA DENUNCIA QUE ALGÚNS VIEIROS ESTÁN IMPRACTICABLES.

Barreiros, 27 de novembro de 2016. O Concello obrigará a unha empresa madeireira a deixar en perfecto estado unha estrada en San Xusto, que estiveron a empregar para extraer a madeira do monte. Segundo o alcalde, Alfonso Fuente, algúns vieiros atópanse impracticables.

O rexedor explicou que “desde hai aproximadamente un mes sabemos que hai unha empresa que está a sacar madeira do monte na parroquia de San Xusto. Se ven contactando con esta firma para que tivese os camiños en bo estado e que se puideran empregar por parte dos veciños. Pero ultimamente poidas constatar que estaban impracticables”.

Fuente Parga contou que “a semana pasada eu me poñía en contacto con responsables da empresa para que iniciaran os traballos de recuperación destes camiños, rematou esta semana e esas tarefas están sen facer. Polo tanto iniciaremos os trámites pertinentes para obrigar a esta empresa para que repoña ese camiño de inmediato, dado que está a causar bastantes problemas nos veciños e veciñas daquela zona, que non poden acceder nin ás súas parcelas nin aos seus montes”.

O alcalde barreirense dixo: “todos entendemos que o sector da madeira ten que funcionar, todos entendemos que a madeira hai que sacala dos montes, pero tamén os madeiristas teñen que entender que os veciños teñen que utilizar as estradas para poder acceder ás súas vivendas e ás súas propiedades. Teñen que iniciar os traballos de inmediato para repoñer eses camiños e cando se está a facer unha saca de madeira hai que prever que se poidan utilizar en todo momento”.

Alfonso Fuente subliñou que “hai que facer cumprir a ordenanza que temos no Concello de Barreiros. Nós temos unha ordenanza que obriga a comunicar as sacas de madeira. Veremos si neste caso se cumpriu, penso que non, xa que a día de hoxe non teño constancia de que se comunicase esa saca de madeira e se puxese o aval pertinente, entón haberá que valorar os traballos de reposición dese camiño, ver si a empresa o deixa no mesmo estado no que se atopaba e senón abrir un expediente para deixen eses vieiros no estado inicial no que se encontraban”.

O CONCELLO INICIOU AS OBRAS DE CONSTRUCCIÓN DA NOVA PONTE EN VILAMARTÍN PEQUENO. O PRESUPOSTO RONDA OS 50.000 EUROS E PODERÍAN ESTAR REMATADAS EN TRES MESES.

Barreiros, 22 de novembro de 2016. O Concello iniciou as obras de construción da nova ponte en Vilamartín Pequeño. O investimento ascende a 50.000 euros. O alcalde, Alfonso Fuente, espera que esta obra estea rematada en pouco máis de tres meses.

O rexedor dixo que “é unha obra que se levaba tempo esperando. Houbo que facer proxectos, houbo que solicitar autorizacións e por fin iniciáronse esas obras. Son uns traballos que teñen un custe duns 50.000 euros e consisten en tirar a ponte sobre o rego Porto Bragán, que estaba moi mal. Esta ponte xa se reforzara hai anos, era moi estreita e ampliárase. E coas riadas agora non quedaba máis que demoler todo, a parte antiga e a que se aumentara e facer unha ponte nova”.

Alfonso Fuente explicou que “vai levar un ancho superior do que tiña ata o de agora, posto que por alí pasan moitos camións por temas moi vinculados á gandería porque é unha zona onde hai moitas explotacións grandes, e polo tanto era unha obra moi demandada”.

O alcalde barreirense espera que “non se demore máis aló de tres meses esta obra. A verdade é que durante este tempo, xa estes últimos días estivo cortada. Tivéramos postas unhas planchas de ferro para non tela cortada e que se puidera estar utilizando, e agora co último deterioro houbo que cortala. Estase utilizando outra vía que está soportando un peso moi elevado de camións e se está destrozando. Polo tanto esperamos repoñer canto antes esta ponte para que se poida volver utilizar, e despois faremos o arranxo desa estrada que están empregando agora como alternativa e que tamén a verdade se está deteriorando bastante”.

Fuente Parga subliñou que “esta é unha obra que está financiada polo Plan de Obras e Servizos da Deputación e o Concello”.

Por outra banda, o alcalde de Barreiros contou que “estamos coas obras de canalización de augas. Tivemos un problema cunha das fincas para onde vai o depósito de cabeceira en Celeiro de Mariñaos, xa o temos resolto e polo tanto espero que ao mellor antes de final de ano poida estar traballándose nesa obra”.

Alfonso Fuente comentou que “se está a traballar en canto a actualizacións, proxectos, modificacións de proxectos e demais, pero o que é en obra en si aínda non se empezou. Eu conto con que antes de final de ano se poida empezar a obra, para que antes do verán poidamos ter parte da mesma en uso para poder aproveitala. Se ben este ano non tivemos moito problema de abastecemento, pero todo o que sexan melloras e aumentos benvidos serán”.

O CONCELLO INICIARÁ EN BREVE A CONSTRUCCIÓN DUNHA PONTE EN VILARMARTÍN PEQUENO QUE SUBSTITUIRÁ Á EXISTENTE, DANADA POLOS TEMPORAIS. 

Barreiros, 20 de agosto de 2016. O Concello iniciará en breve a construción dunha ponte en Vilamartín Pequeno, segundo deu a coñecer o alcalde, Alfonso Fuente. Esta nova substituirá á existente que resultara danada polos temporais.

O rexedor anunciou que “en breve se iniciarán os traballos de construción dunha nova ponte en Vilamartín Pequeno. Trátase dunha ponte que quedou moi danada cando fora dos temporais. Estivo en servizo, puxemos unhas chapas metálicas e mantivémola en servizo durante todo este tempo, pero estes días sufriu máis deterioro”.

Alfonso Fuente Parga subliñou que “cortamos xa a estrada e o inicio dos traballos é inminente. Eu visitaba onte esa zona e o rego está practicamente sen auga, entonces cremos que é o momento agora mesmo para poder actuar nesa ponte. Hai que retirar a ponte antiga, hai que levantala, e facer de inicio a ponte nova”.

O alcalde, acompañado do presidente da asociación de veciños, visitou a zona na que se levantará a nova ponte en Vilamartín Pequeno.

O CONCELLO INICIOU AS OBRAS DE MELLORA DE BEIRARRÚAS EN SAN COSME. O INVESTIMENTO ASCENDE A 50.000 EUROS E OS TRABALLOS PODERÍAN ESTAR REMATADOS A FINAIS DE SETEMBRO.

Barreiros, 19 de agosto de 2016. O Concello ven de iniciar as obras de mellora de beirarrúas en San Cosme. O investimento ascende a 50.000 euros e está previsto que os traballos rematen a finais do mes de setembro.

O alcalde, Alfonso Fuente, anunciou que “en Barreiros iniciáronse os traballos na parroquia de San Cosme para arranxar as beirarrúas e dotalas de mellores servizos. Imos cambiar a traída de auga, o saneamento, a plaqueta e reordenar o que son as beirarrúas que baixan á estrada da praia no centro de San Cosme”.

O rexedor lembrou que “estas beirarrúas no seu momento se levantaran por unha rotura de auga, quedaron reparadas en precario e agora se vai facer unha obra para acondicionar o que é o entorno urbano de San Cosme e ir mellorando aquí na zona centro”.

Fuente Parga explicou que “nun dos casos o que se fai é arranxar as existentes e noutro se fan beirarrúas novas en zonas que non existían”.

O alcalde barreirense subliñou que “estamos falando dun investimento duns 50.000 euros e as obras terían que ter rematado antes de finais de setembro”.

O CONCELLO REALIZA ESTES DÍAS TRABALLOS DE MELLORA EN DIVERSAS ESTRADAS BARREIRENSES. AS OBRAS, SEGUNDO O ALCALDE, REMATARÁN DENTRO DUNHA SEMANA.

Barreiros, 22 de xullo de 2016. O Concello realiza estes días melloras en diversas estradas de Barreiros, segundo deu a coñecer esta mañá o alcalde, Alfonso Fuente Parga.

O rexedor dixo que “estes días iniciáronse obras de mellora en varios vieiros do noso municipio. Acábase de aglomerar un tramo na parroquia de Cabarcos, na estrada que vai desde a vía da Xunta ata a igrexa. Hoxe mesmo están aglomerando e ensanchando a que vai por detrás do pavillón de deportes, na parroquia de San Cosme. E tamén continuarán as obras no Camiño Real en San Miguel”.

Segundo Alfonso Fuente “son camiños bastante transitados, estaban con riego e agora o que se lles fai é meter asfalto para que sexa mellor a circulación e sempre tentando arranxar esas estradas que consideramos que son máis transitadas principalmente. Optamos por facer este riego asfáltico porque así aguantará moito máis tempo a estrada en bo estado”.

O alcalde barreirense agarda que no prazo dunha semana estes traballos estean rematados.