O CONCELLO FAI OBRAS PARA ARRANXAR AS HUMIDADES NO PAVILLÓN DE DEPORTES DO COLEXIO DE SAN MIGUEL E NO DE SAN COSME LEVOU A CABO MELLORAS NO PECHE EXTERIOR DO CENTRO.

Barreiros, 12 de setembro de 2017. O Concello realiza obras de mellora nos colexios de San Cosme e San Miguel. No de San Cosme os traballos consistiron en arranxos no peche exterior do centro e pintado dalgunha das aulas. E no de San Miguel estase facendo un drenaxe para solucionar as humidades detectadas no pavillón de deportes.

O alcalde, Alfonso Fuente, contou que “estivemos facendo unha serie de melloras nos dous colexios de Barreiros. No de San Cosme arranxamos o seu valado, dado que a tela metálica estaba en mal estado e fixemos esa reparación. Tamén pintamos unha das aulas que quixeron cambiar, é onde van poñer agora a biblioteca e que estaba destinada a outra materia”.

O rexedor explicou que “tamén se vai proceder a cambiar a cancela exterior do peche do colexio xa que está en mal estado, xa están traballando neste tema. Quédanos colocar unha serie de losetas no parque, xa que cando se fixo non se colocaron todas as losetas de goma e vaise rematar ese traballo”.

Fuente Parga engadiu que “ademais no colexio de San Miguel tamén se fixeron traballos de mellora, de podas, e estase levando adiante un traballo importante que requiría unha intervención para sacar as humidades do pavillón de deportes. Sorprendeunos cando fixemos a escavación que as baixantes dos canalóns foran para o interior en lugar de saír para fora, o cal provocaba que tan pronto había un atasco se formaban charcas dentro do pavillón. Fíxose unha zanxa por fora ata chegar ás zapatas das columnas do pavillón e estase facendo un drenaxe sacando eses canalóns para fora, e mellorando toda esa zona dado que é onde se dá a ximnasia e actividades deportivas dos nenos e estaba cheo de humidades”.

A XUNTA DE GOBERNO APROBOU AS OBRAS A INCLUÍR NO PLAN ÚNICO E DEU TRASLADO DO ACORDO Á DEPUTACIÓN DE LUGO. O INVESTIMENTO ASCENDERÁ A UNS 200.000 EUROS, SEGUNDO DEU A COÑECER ESTA MAÑÁ O ALCALDE, ALFONSO FUENTE.

Barreiros, 2 de maio de 2017. A xunta de goberno aprobou as obras a incluír no Plan Único e deu traslado do acordo á Deputación Provincial de Lugo, segundo ven de confirmar o alcalde, Alfonso Fuente. O investimento total ascenderá a preto de 200.000 euros. Trátase das melloras de varios camiños, alumeados públicos e unha traída de auga.

As obras a realizar a través do Plan Único son o camiño de Sarxende a Casa do Merlo; o camiño da igrexa de Reinante a Casa de Panta; o acceso ao aparcamento que hai detrás dos colexios vellos de San Miguel; o acceso ao campo de fútbol de As Valgas; o camiño que vai de Remior a Viladaide, “que é moi utilizado e ao que se lle vai dar aglomerado”; outro pequeno camiño en Viladaide, “onde se fixera a beirarrúa e quedou pendente arranxar ese viario”; a conexión da traída de auga entre os dous depósitos, o da Barranca co de Reinante, “faltaba un tramo desa obra, que imos facer agora con cargo a este Plan Único”; e tres alumeados públicos, un nas Saíñas en Celeiro de Mariñaos e dous en Cabarcos, en Seoane e no Couto.

Os investimentos a realizar ascenden a máis de 75.000 euros no caso dos camiños; a 80.000 euros a traída da auga e a 35.000 euros aproximadamente os alumeados públicos.

O CONCELLO FAI OBRAS DE MELLORA EN BEIRARRÚAS DE SAN MIGUEL DE REINANTE E SAN COSME DE BARREIROS, SEGUNDO DEU A COÑECER O ALCALDE.

Barreiros, 29 de marzo de 2017. O Concello leva a cabo obras de mellora en beirarrúas de San Miguel de Reinante e San Cosme de Barreiros. O alcalde, Alfonso Fuente, espera que os traballos estean rematados en breve.

O rexedor contou que “en Barreiros estamos traballando xa en dúas obras que esperamos que se poidan empezar en breve. En San Miguel de Reinante continuamos cunhas beirarrúas que fai pouco, aproveitando que metíamos unha traída de auga, se renovaban e ampliaba unha zona que non tiña beirarrúas. Seguindo pola marxe dereita cara a Reinante queremos continuar esa beirarrúa e meter un carril de servizo. Ademais Fomento está a poñer problemas coas saídas directas á nacional, así que para evitar tamén accidentes e protexer ao peón con esas beirarrúas das que carecen agora nunha zona que consideramos vai acadando un grado de urbanización importante”.

O alcalde barreirense explicou que “na parroquia de San Cosme de Barreiros hai unha zona, despois desta obra que se facía e se remataba non hai moito tempo, que precisamente estes días estaban acabando de colocar as farolas. Quédanos aínda un treito que hai que adoquinar. Nunha beirarrúa que estaba rematada, estaba sen adoquín, polo que poñerase adoquín e remataranse esas beirarrúas en zonas que faltan”.

Fuente Parga salientou que “son obras que esperamos que se poidan poñer en marcha en breve para mellorar o entorno urbano tanto na parroquia de San Miguel de Reinante como na de San Cosme de Barreiros”.

O CONCELLO VEN DE ACONDICIONAR PARA APARCADOIRO O TERREO A CARÓN DO POLIDEPORTIVO DO COLEXIO DE SAN MIGUEL DE REINANTE.

Barreiros, 2 de decembro de 2016. O Concello ven de acondicionar para aparcadoiro o terreo situado detrás do polideportivo do colexio de San Miguel de Reinante.

O alcalde, Alfonso Fuente, anunciou que “o Concello acaba de aproveitar unha zona detrás do ximnasio do colexio de San Miguel de Reinante. Era un espazo que estaba con maleza e estaba moi desaproveitado. Acondicionámolo para facer de aparcadoiro, dado que nese pavillón se realizan distintas actividades, incluso externas ao que é o propio colexio, entrando pola porta lateral que dá ao exterior do edificio. Alí fai ensaios o Arco da Vella, agora cando veña a Cabalgata de Reis tamén vai haber actividade alí e ademais está a ensaiar unha charanga, que se está preparando para o Entroido de Barreiros”.

O rexedor engadiu: “pensamos que aquela zona podíamos aproveitala para que aparcaran alí os coches e fose máis cómodo e non quedar pola beira da estrada e provocar problemas no tráfico”.

Fuente Parga subliñou que “se trata de ir mellorando pouco a pouco esas zonas que están desaproveitadas e foi o que fixemos neste caso”.