ESTES DÍAS INICIASE A SEGUNDA FASE DAS OBRAS DE ACONDICIONAMENTO DA LU-133 AO SEU PASO POR VILAMAR E CABARCOS. PARA FUENTE PARGA CONTRASTAN ESTES TRABALLOS FINANCIADOS POLA XUNTA DE GALICIA CO MAL ESTADO QUE PRESENTA A ESTRADA PROVINCIAL QUE VAI DE VILAMAR A SAN XUSTO E QUE “PRECISA DUNHA REXENERACIÓN TOTAL”.

Barreiros, 21 de xuño de 2016. Estes días da comezo a segunda fase das obras de acondicionamento da LU-133 ao seu paso por Vilamar, en Barreiros. Trátase do treito comprendido entre o quilómetro 4 e a rotonda que enlaza coa estrada que vai a Trabada.

O alcalde, Alfonso Fuente, relatou que “en Barreiros estamos outra vez de noraboa. Viñamos anunciando no seu momento cando se fixo o aglomerado da estrada LU-133 que vai dende Vilamar e pasa por Cabarcos, o arranxo deses primeiros catro quilómetros que se fixeron ao longo do ano pasado preparándose as cunetas e todo en formigón. Quedábanos como eu xa anunciara, e xa lle pedira así á Xunta de Galicia, a segunda fase. Vaise iniciar a devandita fase co aglomerado desde o quilómetro catro ata a rotonda que une coa estrada que sube a Trabada”.

O rexedor sinalou que “era algo que tíñamos aí pendente de facer e que se vai iniciar nestes días, o que é o aglomerado. Quedará para máis adiante ir arranxando as cunetas, pero a capa de rodaxe vaise facer toda nova”.

Fuente Parga salientou que “é un feito facer esta segunda fase na estrada LU-133 e facer este segundo aglomerado que vai deixala lista ata a rotonda dado que moitos veciños da zona de Cabarcos utilizan este viario para baixar ao centro, a San Cosme, ou ben para saír cara a Trabada. É unha estrada que está a ser moi utilizada e tamén agora mesmo con moitos camións que saen do CAVI de  Irmandiños. Xa digo é un feito poder facer estas obras en dúas anualidades”.

O alcalde barreirense explicou que “pola contra atopámonos coa estrada da Deputación Provincial que nace tamén en Vilamar e que vai a San Xusto, unha estrada moi transitada por todos os veciños das parroquias da zona de San Xusto, que está nun estado pésimo. Levántase toda a estrada, necesitaba unha rexeneración total, un aglomerado total que ben se podía ter feito en fases como xa teño demandado nalgunha ocasión, pero nin unha primeira fase foron capaces de realizar. Está nun estado moi malo,  xa se está levantando o firme da estrada e o que se fai nalgúns casos é un bacheo, que pouco serve”.

Fuente Parga comentou que “os propios veciños ven con asombro como por un lado a Xunta de Galicia está a reparar os seus viarios e ademais con novos aglomerados, e pola contra nunha estrada, que é da Deputación Provincial, que non se actúa nela nin o máis mínimo. É algo que chama moito a atención”.

O CONCELLO COMEZOU ESTES DÍAS AS OBRAS DE MELLORA DO ABASTECEMENTO DE AUGA NAS PARROQUIAS DE SAN COSME E SAN MIGUEL. O INVESTIMENTO TOTAL ASCENDE A 400.000 EUROS.

Barreiros, 10 de maio de 2016. O Concello comezou estes días as obras de mellora do abastecemento de auga nas parroquias de San Cosme e San Miguel. O orzamento total ascende a 400.000 euros.

O alcalde, Alfonso Fuente, explicou que “estes días iniciábanse obras en Barreiros, nas parroquias de San Cosme e de San Miguel de Reinante. Estas obras, como xa o tíñamos anunciado, consisten na mellora do abastecemento de augas”.

O rexedor relatou que “se vai meter un tubo que vai comunicar no caso de San Miguel o depósito da Barranca co depósito de Reinante para aumentar a capacidade de almacenamento e mellorar tamén o servizo. E aproveitando esa obra vaise ampliar a estrada na zona de Obra Pía, se lle vai dar máis ancho e mellorar o seu asfalto”.

O alcalde de Barreiros indicou que “no caso de San Cosme se levantan as beirarrúas situadas fronte á da Casa Consistorial para chegar ata o depósito da Folgueirosa e unir tamén o depósito co de Merille, aumentar a capacidade de almacenamento e a rede de auga. Ao mesmo tempo que se fai esta obra se vai mellorar a beirarrúa e se vai meter tubaxe para o saneamento e máis para pluviais, é dicir separar residuais de pluviais que ata o de agora ían xuntas no mesmo tubo”.

Alfonso Fuente subliñou que “estas obras teñen cada unha delas presupostos que se aproximan aos 200.000 euros. Quixera salientar que se acometen con fondos daquel convenio que se asinara no seu día cos promotores e que tanto dera que falar á oposición, que criticaba que eses cartos ían destinados solo a legalizar e a favorecer ás obras propias deles e neste caso estamos a ver que o que vai beneficiar é a todos os veciños e veciñas de Barreiros e concretamente aos desas parroquias. Son melloras de infraestruturas de abastecemento, de beirarrúas e rúas, que xa se están executando neste momento”.

O alcalde de Barreiros anunciou que “en breve tamén, nuns días iniciarase outra obra tamén adxudicada con fondos dese convenio que supón 1.200.000 euros para ampliar o depósito de San Caetano e a depuradora de augas de Celeiro de Mariñaos”.

Alfonso Fuente pide desculpas “sobre todo aos veciños que están nesas zoas onde se están a executar esas obras, polos os inconvenientes que van ter estes días. Estamos falando coas empresas para que apuren na maior medida as obras co obxectivo de non meterse durante o verán coas obras e telas practicamente rematadas ou rematadas na súa totalidade”.

Finalmente o rexedor salientou: “creo que son obras importantes, melloras importantes, que como pasa ás veces nas obras de saneamento e abastecemento cando se rematan quedan ocultas debaixo da terra, pero a verdade despois é un beneficio o que nos produce á hora de abrir o billa. Como era o caso de San Cosme, onde a depuradora de residuais tiña un funcionamento precario porque chegaba moita carga tanto de residuais como de pluviais xunta, agora con estas obras se van ir separando pouco a pouco”.

Barreiros |
La carretera Reme-Villamar estará cortada al tráfico entre el martes y el viernes de la próxima semana para realizar trabajos de reparación

A estrada Reme-Vilamar permanecerá pechada ao tráfico entre o martes e venres da semana que vén por mor das obras que realiza a Xunta entre Vilamar e o quilómetro catro. Así o anunciou o alcalde, Alfonso Fuente, que lembra aos veciños que durante eses días deben usar vías alternativas nos seus desprazamentos.
O rexedor explicou que “a vindeira semana, dende o martes ata o venres seguramente, vaise estar levando a cabo o aglomerado da estrada Reme-Vilamar, dos catro quilómetros que se están arranxando dende Vilamar ata o quilómetro catro. Polo tanto esta estrada vai permanecer pechada ao tráfico durante gran parte do día polos traballos de aglomerado que se pretenden facer en toda a vía ao mesmo tempo, non quedando ningún carril en servizo. Os traballos quedarán mellor si se fai todo o treito completo”.
Fuente Parga pide que “calquera que teña que circular por esa estrada ou acostume facelo que use vías alternativas. Ao mesmo tempo tamén están avisados os autobuses escolares. Calquera persoa que durante a semana que vén teña que circular por esa vía debe usar as estradas alternativas e dende o Concello pedimos desculpas polas molestias que se poidan ocasionar. Pero o motivo é mellorar o estado desa estrada”.

O CONCELLO REALIZA DIVERSAS OBRAS NO MUNICIPIO, SEGUNDO DEU A COÑECER HOXE O ALCALDE, ALFONSO FUENTE PARGA. ALGUNHAS REMATARÁN ESTES DÍAS.

Barreiros, 22 de setembro de 2015. O Concello realiza obras no acceso ao colexio de San Miguel e tamén nas parroquias de San Cosme e de Reinante, segundo deu a coñecer hoxe o alcalde, Alfonso Fuente.

O rexedor explicou que “no acceso ao colexio de San Miguel, na rúa que sube cara a Remourelle, fíxose alí unha actuación para que aparquen os autobuses e máis para os peóns, para que poidan estacionar na zona de abaixo e ir andando por un paso de peóns. Na parte de arriba o autobús tiña que subir case ata a autovía para poder dar a volta e despois descargar aos nenos pola man da entrada do colexio e o que se fixo foi adquirir un terreo e mellorar alí para que o autocar poida dar a volta ao lado mesmo do centro, co cal tamén se acurta en tempo a viaxe”. Segundo Fuente Parga “supoñía un trastorno ter que subir case a preto da autovía para poder dar a volta e volver baixar cos nenos, incluso co perigo que entrañaba levar aos nenos a dar a volta ata aquel punto”.

Para o alcalde barreirense “esa é unha obra importante, que entra dentro doutras como foron tamén o aglomerado na parroquia de San Cosme, concretamente na zona das vivendas sociais, onde estaba a gardería municipal. Faltaba aquela zona por reparar o aglomerado. E tamén fronte a teleclub había unha estrada que estaba en mal estado e hai uns días foi aglomerada”.

Alfonso Fuente Parga relatou que “tamén se están rematando as obras en Reinante, no acceso á praia. Estaba feita a principal, que se preparara para o verán, pero faltaba outro camiño que vai ao redor da urbanización. Alí era coa execución dun aval do promotor. Esas obras estanse rematando estes días. Vanse facer tamén melloras nalgunhas estradas, como son a que vai por detrás do pavillón do colexio de San Miguel ou o camiño que baixa cara a praza do Souto. Estas obras vanse rematar estes días, espero que entre esta semana e a que vén eses traballos queden concluídos xa”.