O BNG PREGUNTA AO GOBERNO DE BARREIROS POLA CONSTRUCCIÓN DUNHA SUBESTACIÓN ELÉCTRICA NO MONTE DAS FACHAS

“Se se confirma a existencia do xacemento e se promociona convintemente, Barreiros pode converterse nun referente arqueolóxico con este e o xacemento da Roda, en Reinante”, asegura Ana Ermida.

“Non podemos arriscarnos a autorizar a construcción dunha subestación eléctrica enriba dun lugar onde pode haber restos arqueolóxicos”, afirman desde o BNG.

Barreiros, 9 de maio de 2016. O grupo municipal do BNG en Barreiros presentou unha serie de preguntas dirixidas ao alcalde sobre a concesión da licenza de obras que debe outorgar o concello para a construcción dunha subestación eléctrica no Monte das Fachas, en San Xusto.

Neste lugar, coñecido por albergar algún tipo de xacemento megalítico, preténdese instalar unha subestación eléctrica para a que parece que a delegación de Patrimonio da Xunta non pon ningún impedimento. Pola contra, a existencia do xacemento está historicamente documentada e existen referencias ao mesmo tanto en textos de historiadores como no propio inventario arqueolóxico elaborado á hora de delimitar o Camiño de Santiago.

Desde o BNG realizan unha batería de preguntas coas que pretenden “comprobar se se está poñendo todo o celo que corresponde por parte das administracións á hora de preservar un xacemento que pode ter alto valor tanto histórico coma cultural”, explican.

“É sorprendente que a propia Xunta catalogue este xacemento hai uns anos e conclúa agora que non existe, cando se trata de construir unha subestación eléctrica no lugar. Queremos pensar que non se priorizan outros intereses por riba dos históricos, culturais e patrimoniais”, afirma a portavoz do BNG en Barreiros, Ana Ermida.

Nas preguntas realizadas para a súa contestación no pleno de maio ou por escrito se houbera que dar algún paso antes dese pleno, o BNG pretende saber se o Concello ten coñecemento da realización e dos resultados das catas realizadas por Patrimonio, se se personou no procedemento á fin de notificar a existencia do xacemento ou se, á vista dos datos existentes, ten previsto outorgar a licenza sen máis comprobacións.

Desde o BNG consideran que “non pode priorizarse a construcción dunha subestación eléctrica á preservación do patrimonio cultural, polo que a obriga do Concello neste caso é facer o posible por clarificar a situación e, desde logo en caso de dúbida, debe facilitarse a construcción noutro lugar e preservar un posible xacemento que podería promocionarse e ter grande importancia histórica á altura de outros similares en Europa como o de Stonehenge e que se sumaría á existencia no concello doutro similar no caso da Roda, en Reinante”, conclúen desde a formación nacionalista.

Ana B. Ermida Igrexas, Antonio Veiga Outeiro, Montserrat Porteiro Sánchez e Dámaso Ratoeira Basanta como concelleiras e concelleiros do grupo municipal do BNG en Barreiros, ao abeiro da lexislación vixente, presentan a seguinte

MOCIÓN PARA SOLICITAR UNHA NOVA REVISIÓN CATASTRAL Á BAIXA DOS VALORES OUTORGADOS AOS INMOBLES EN BARREIROS

Nos últimos anos as veciñas e veciños de Barreiros veñen sufrindo unha suba desmesurada de taxas e impostos que pouco ou nada se corresponden cos servizos que reciben. Unha das subas máis acuciantes foi a experimentada polo Imposto sobre Bens Inmobles.

Primeiro, foi o propio goberno municipal quen decidiu incrementar o tipo impositivo a aplicar ata situalo nun 0,88% (o máis alto da provincia). Posteriormente, o goberno central iniciou unha revisión catastral que culminou con centos de familias abonando unha taxa de 60€ por unha regularización catastral que tivo máis de medida recaudatoria que reguladora. A raíz desa revisión, foron incluídas como inmobles calquera tipo de edificación. chegando a producirse regulacións catastrais por casetas de cans ou pérgolas de xardín.

Como consecuencia desta revisión realizada polo goberno do Estado, as veciñas e veciños de Barreiros tiveron que facer fronte a recibos de ata catro anos atrás nos que se incluían os novos inmobles e os novos valores, chegando en moitos casos a afrontar recibos que quintuplicaban o que viñan pagando por este imposto.

É evidente, pola idiosincrasia galega, que as zonas máis afectadas por esta medida son as zonas rurais. O rural galego, e Barreiros non é excepción, caracterízase por numerosas construccións, a modo de palleiras ou alpendres que, se ben carecen de valor material por si mesmas, prestan servizo elemental á hora do desenvolvemento das labores agrarias.

Estes elementos foron incluídos na regularización realizada polo Ministerio e foron valorados como  se de inmobles habitables se tratara, non tendo en conta que se trata de construccións destinadas á agricultura que, ademais, poderían beneficiarse de bonificacións e dándolles un valor moi superior ao real.

Ademais das consecuencias directas que isto ten no propio recibo do IBI, que o BNG tratou de paliar propoñendo unha modificación da ordenanza municipal que permita rebaixar o tipo impositivo aplicado e abra a posibilidade de realizar bonificacións para determinadas construccións sobre o que houbo acordo no pleno e se incumpliu na súa execución por parte do goberno municipal, os novos valores aplicados teñen unha serie de consecuencias “indirectas” que lles están afectando considerablemente ás familias do rural barreirense. Deste xeito, ao outorgar unha valoración catastral tan alta, ven como se incrementan os impostos que deben abonar por transmisións inter vivos ou mortis causa ou como as axudas (ou incluso bolsas de estudos para as súas fillas e fillos) lles son denegadas por ter un patrimonio moi elevado que, na realidade, dista moito desa valoración.

O feito de que a revisión se fixese de xeito lineal, sen aplicar ningún tipo de variable polo tipo de inmoble ou a ubicación do mesmo, leva a que especialmente no caso de familias con explotacións agrarias, estean enfrontando un valor patrimonial dos seus inmobles que non se adapta para nada á realidade. En primeiro lugar, á realidade social de Barreiros, porque non pode ser o mesmo o valor que se lle aplica a un inmoble para vivir situado en primeira liña de praia que a un inmoble destinado a palleira ou establo situado nunha parroquia do interior. Incluso o valor das vivendas non poden ser iguais na costa que no interior. Pero, en segundo lugar, tampouco se adapta á realidade económica actual: a revisión foi realizada tomando como referencia uns valores que proviñan dunha situación económica notablemente distinta e outorgouse unha valoración que na actualidade dista moito de ser real.

Tendo en conta o exposto, consideramos que é xusto que o goberno municipal en primeiro lugar cumpra co acordo plenario adoptado por unanimidade a instancias do BNG e proceda a modificar a ordenanza reguladora do IBI, rebaixando o tipo impositivo aplicable e establecendo as bonificacións que sexa posible de cara a minimizar no posible as nefastas consecuencias que está a ter a suba deste imposto nas economías familiares.

E, en segundo lugar, como defensor dos intereses xerais, consideramos que o goberno municipal debe dirixirse ao goberno do Estado para solicitar unha nova valoración catastral á baixa na que se tomen como referencia os valores patrimoniais actuais dos inmobles, dacordo coa actual situación económica e na que se diferencien os valores tanto en función da ubicación do inmoble (na costa ou no interior) como do seu uso.

Por todo o exposto con anterioridade, o grupo municipal do BNG propón ao Pleno da Corporación de Barreiros a adopción dos seguintes ACORDOS:

PRIMEIRO: Que o goberno municipal inicie os trámites, dando participación a todos os grupos da corporación, para modificar a ordenanza reguladora do IBI, procedendo a rebaixar o tipo impositivo aplicado polo Concello de Barreiros e instaurando as bonificacións que sexa posibles.

SEGUNDO: Que o goberno municipal se dirixa ao goberno do Estado para solicitar unha nova revisión catastral na que se outorguen valores á baixa, tendo en conta a nova situación económica e os valores reais dos inmobles e a súa ubicación dentro do propio concello e o uso ao que se destinan.

En Barreiros a 4 de maio de 2016.

Ana B. Ermida Igrexas                                                                     Antonio Veiga Outeiro

Concelleira-portavoz do GM                                                                        Concelleiro do GM

do BNG en Barreiros                                                                        do BNG en Barreiros

Montserrat Porteiro Sánchez                                                 Dámaso Ratoeira Basanta

Concelleira do GM                                                               Concelleiro do GM

do BNG en Barreiros                                                            do BNG en Barreiros

AO ALCALDE-PRESIDENTE DO CONCELLO DE BARREIROS

O BNG DE BARREIROS PIDE QUE AS MODIFICACIÓNS DO IBI SEXAN TAMÉN NO TIPO IMPOSITIVO E NOS VALORES QUE SE LLES APLICAN AOS INMOBLES PARA DIMINUIR OS PREXUÍZOS QUE OCASIONAN OS ACTUAIS .

“Non hai debate posible no seguinte pleno, porque a modificación da ordenanza para rebaixar o IBI xa foi aprobada por unanimidade a instancias do BNG en setembro de 2015. O único que están facendo é cumprir un acordo oito meses despois de tomado”, afima a portavoz municipal Ana Ermida.

Os nacionalistan rexistraron unha moción reiterando a súa solicitude de rebaixa do tipo impositivo e unha revisión dos valores á baixa que non perxudique ás familias en transmisións, axudas, etc. por contar cun valor patrimonial irreal.

Barreiros, 4 de maio de 2016. O BNG de Barreiros continúa propoñendo medidas para tratar de rebaixar os prexuízos que as continuas modificacións do IBI impostas polo Partido Popular, ben desde o goberno do estado ou desde o propio concello, están tendo nas veciñas e veciños de Barreiros.

Neste sentido, veñen de rexistrar unha moción na que reiteran a solicitude que xa fixeron no pleno de marzo para que o goberno municipal se dirixa ao goberno do Estado pedindo unha nova valoración dos inmobles á baixa, tendo en conta a actual situación económica, o uso e a ubicación dos mesmos.

Desde o BNG valoran positivamente o anuncio feito nesta mesma semana polo alcalde de Barreiros de aplicación de bonificacións ás explotacións agrarias xa que foi unha proposta que fixo o BNG. Recordan que “foi un acordo que se tomou no pleno de setembro de 2015 despois do debate dunha moción do BNG na que se pedía que se rebaixara o tipo impositivo que se aplica en Barreiros  (que é o máis alto da provincia) e que se estableceran as bonificacións que foran posibles para diminuir a carga impositiva.” Por iso “non hai debate posible no seguinte pleno, tal e como pretende trasladar o alcalde nas súas declaracións”, afirma Ana Ermida. “O debate xa se deu, e foi porque o pediu o BNG, hai oito meses. O único que está facendo agora é cumprindo, parcialmente, ese acordo que se adoptara por unanimidade.”

A iniciativa que presenta agora a formación nacionalista pide, en primeiro lugar, o cumprimento íntegro do acordo de setembro. “Non só a aplicación de bonificacións. Senón, tamén que se rebaixe o tipo impositivo que aplica o concello -que é do 0,88%- e que lle afecta a todas as veciñas e veciños, con independencia de se teñen explotacións agrarias ou non.”

“Desde logo que é fundamental tomar medidas de axuda ás explotacións agrarias pola súa relevancia na economía municipal e pola dificil situación que atravesan, pero as consecuencias das decisións do goberno do PP (que pasou dun 0,6% ao 0,88% en 2012) perxudican a todas as veciñas e veciños e, neste sentido, deben adoptarse medidas que poidan beneficiar tamén a toda a poboación”, explican desde o BNG.

O BNG pide que, oito meses despois, o acordo que se tomou se cumpra na súa totalidade e que a revisión da ordenanza que se propón se faga dacordo con todos os grupos municipais e se aproveite tamén para rebaixar o tipo impositivo que marca o concello, beneficiando así a todas as veciñas e veciños.

Solicitude dunha nova valoración catastral.

Xa no último pleno celebrado o BNG pediulle ao goberno municipal que se dirixa ao goberno do Estado para que leve a cabo unha nova valoración catastral á baixa na que os valores se adapten á actual situación económica e na que se teñan en conta tanto o uso dos inmobles como a súa ubicación.

A portavoz municipal explica que “esta é unha medida que afecta a toda a poboación, pero especialmente ás construccións do rural e explotacións agrarias, xa que é onde máis inmobles existen (palleiras, almacéns, pendellos…) que foron valorados moi por riba do valor real.”

“Se as bonificacións e a rebaixa do tipo impositivo son importantes para tentar minorar o prexuízo no recibo do IBI, o feito de rebaixar o valor que se lle outorga aos inmobles é fundamental para evitar outras consecuencias que tamén están a soportar as familias barreirenses ao aparecerlles uns valores patrimoniais que nada teñen que ver cos reais”, explica Ana Ermida.

A nacionalista pon como exemplo “os impostos que deben pagar en caso de transmisións, tanto vendas como herdanzas, que se aplican sobre os valores patrimoniais ou os problemas para optar a bolsas de estudos dos fillos, ao computarse un valor patrimonial altísimo como consecuencia dos valores outorgados e que nada teñen que ver coa realidade.”