O Ministerio de Fomento, segundo publica este mércores o Boletín Oficial do Estado, formalizou o contrato de obras de rehabilitación do firme da estrada N-642, na provincia de Lugo. O orzamento de adxudicación ascende a 881.107 euros.

A estrada N-642 entre Barreiros e San Cibrao, na Mariña lucense, discorre polos termos municipais de Foz, Burela e Cervo.

A obra consiste na rehabilitación estrutural do firme en varios tramos da estrada N-642. Concretamente entre os puntos quilométricos (p.k.) 28,800 ao 36,500; 42,100 ao 42,350 e 47,400 ao 48,700.

O primeiro tramo obxecto desta actuación, entre os p.k. 28,800 ao 36,500, corresponde co núcleo de Mañente, variante de Foz e ao núcleo de Fazouro; o segundo tramo, entre os p.k. 42,100 ao 42,350, corresponde ao comezo da variante de Burela, e o terceiro tramo, entre os p.k. 47,400 ao 48,700, corresponde ao final da variante de Burela e o núcleo Daián.

Os traballos centraranse fundamentalmente no fresado e reposición de firme coa eliminación parcial e reposición das capas do firme existente que presentan deficiencias e deformacións nestes tramos.

Nestes tramos, ademais, selaranse gretas existentes no firme e serán repostas as marcas viarias.