O BNG DE BARREIROS IMPUGNA A CONVOCATORIA DUN PLENO MUNICIPAL NO QUE O ALCALDE IMPIDE QUE SE SOLICITE O ARRANXO OU DIÑEIRO Á DEPUTACIÓN PARA O  VIAL CEDIDO AO CONCELLO

O Alcalde incumpre a lei e négase a tratar a solicitude de pleno extraordinario pedido polo BNG para solicitar o arranxo do vial ou diñeiro á Deputación, incluíndoa irregularmente nun pleno que non responde ao solicitado.

O BNG pide a suspensión da sesión alegando nulidade de pleno dereito da mesma, por terse realizado prescindindo do procedemento establecido.

A convocatoria do pleno foi asinada desde Tenerife, non tendo delegado as súas funcións a pesar de pasar máis de media semana fóra de Barreiros.

Barreiros, 9 de xullo de 2018. O Bloque Nacionalista Galego vén de presentar un recurso de reposición contra a convocatoria do pleno a celebrar no día de hoxe por entender que a mesma é nula de pleno dereito por facerse infrinxindo a lei.

Segundo explica a portavoz municipal do BNG, Ana Ermida, “o alcalde convocou un pleno no que pretende tratar a solicitude que o noso grupo fixo a semana pasada, pero faino incumprindo lei e intentando baleiralo de contido. Pretende que se debata sobre as condicións da cesión dun vial por parte da Deputación ao Concello unha vez que xa se teña aceptado esa cesión.”

“Non sabemos se cre que somos parvas ou o parvo é el. Ou se ten algún interese inconfesable en que ese vial se entregue ao Concello sen arranxar e que teñan que ser as veciñas e veciños de Barreiros os que sufran as consecuencias dunha decisión carente de lóxica e de sentido común”, afirman desde o BNG.

“Xa sabemos que para o goberno municipal de Barreiros saltarse a Lei non é algo que lles cause preocupación, pero deberían ter coidado porque o cántaro que vai moito á fonte acaba rompendo”, aseguran.

O Alcalde convocou o pleno desde Tenerife.

Ademais de incumprir o procedemento ao non respectar a petición do BNG, é chamativo que a convocatoria do pleno foi asinada o 5 de xullo, o mesmo día que o Alcalde comunicaba á prensa que se atopaba en Tenerife. “O Regulamento  de Organización, Funcionamento e Réxime Xurídico das Entidades Locais establece claramente que cando o Alcalde se ausente do término municipal por máis de vintecatro horas, sen ter conferido delegación, (…) substituirao na totalidade das súas funcións, o Tenente de Alcalde a quen lle corresponda, dando conta ao resto da Corporación.”, explica Ana Ermida. “Neste caso, vese que o Alcalde ten un problema grave de confianza no seu primeiro Tenente de Alcalde e no seu equipo de goberno, porque preferiu “gobernar” desde Tenerife que delegar as súas funcións durante o tempo que estivo fóra.”

“É un novo insulto cara a veciñanza de Barreiros que ve como o Alcalde é tan prescindible que mesmo é capaz de “gobernar” a máis de 2.000km do Concello en plena semana de inicio da tempada de verán, cando a poboación de multiplica e se producen situacións que teñen que ser atendidas por alguén con responsabilidade de goberno. Isto vén a demostrar que cando está en Barreiros tampouco ten a cabeza pensando no Concello, pois se é capaz de facer o mesmo desde Tenerife ca estando aquí, é que pouco fai cando está no Concello”, conclúen.

O GOBERNO DE BARREIROS XA GASTOU TODO O ORZAMENTO DISPOÑIBLE PARA MANTEMENTO DE PASEOS, PARQUES E XARDÍNS.

A mediados de ano, coa maioría do traballo de limpeza e desbroce sen facer, o goberno municipal xa gastou 6.000 euros máis do dispoñible nesta partida.

Barreiros, 7 de xullo de 2018. O Bloque Nacionalista Galego de Barreiros vén de comprobar que o goberno municipal gasta sen control en determinadas partidas e como, aínda non a mediados de ano, xa gastaron 6.000 euros máis dos previstos na partida de mantemento de paseos, parques e xardíns.

“Esta situación non vén máis que a confirmar o que dicíamos desde o BNG na aprobación dos orzamentos: xuntan números para facerlles cadrar, pero a realidade é que o que pon o papel non se cumpre”, manifesta a portavoz municipal, Ana Ermida.

“A realidade é que o goberno municipal vai gastar aínda moito máis dos 60.000 euros que prevía gastar, o cal significa que ás empresas privadas que se están encargando desas labores, que non están feitas nin a medias, aínda lles queda moito por facturar”, afirman desde o BNG.

Para a formación nacionalista “o que non é normal é que en menos de seis meses, e cando aínda non se fixeron nin a metade dos traballos de desbroces e mantemento dos paseos, parques e xardíns, xa se gastara máis do previsto para todo o ano. E aínda quedan por facturar os traballos dos meses de xuño e xullo que, imaxinamos, serán os máis numerosos e os que máis gasto supoñan”, explica Ana Ermida.

Segundo o BNG, a consecuencia disto é que se segue cavando o burato económico de Barreiros, séguese despilfarrando diñeiro “porque ninguén pode explicar racionalmente que cos desbroces que se fixeron vaian gastados 66.000 euros” e séguese a acumular débeda que terá que asumirse aprobando esas facturas con cargo ao orzamento do ano que vén. “Están arruinando Barreiros e hipotecando a quen veña despois. Está claro que non lles importa o futuro do Concello. O único que lles importa é que os cartos públicos que xestionan acaben onde lles interesa”, conclúen.

O BNG PIDE UN PLENO EXTRAORDINARIO EN BARREIROS PARA SOLICITAR DA DEPUTACIÓN O ARRANXO DO VIAL CEDIDO A SEMANA PASADA.

A formación nacionalista considera que aceptar a cesión dun vial en mal estado sen negociar o arranxo ou o acompañamento de diñeiro é unha nefasta xestión para o Concello de Barreiros.

Barreiros, 2 de xullo de 2018. O Bloque Nacionalista Galego de Barreiros vén de rexistrar esta mesma mañá unha solicitude formal dun pleno extraordinario, para ser convocado coa maior urxencia posible, a fin de adoptar o acordo de dirixirse á Deputación Provincial para que a cesión do tramo da LU-P 0608, que vai desde a estrada xeral no centro de San Cosme ata a que sube cara a Trabada pola Insua, veña acompañada do aranxo do mesmo ou dunha cantidade de diñeiro suficiente para poder arranxala desde o Concello.

A portavoz municipal, Ana Ermida, explica que “pese a ter presentado un rogo por parte do BNG pedindo esto mesmo a primeiros de xuño, o Alcalde volveu ignorar as necesidades do Concello e solicitou a cesión dun vial que pasará a converterse nunha carga máis para Barreiros. Pedir a titularidade dun vial en mal estado sen pedir o seu arranxo ou diñeiro para levalo a cabo é unha torpeza absoluta, carente da mínima lóxica”, asegura.

Desde o BNG aseguran que “aínda que segundo as declaracións na prensa do alcalde barreirense debemos entender que unha empresa privada realizará esas obras a cambio de non sabemos que beneficios, consideramos que ise non é o xeito oportuno de xestionar os bens e diñeiro público; polo que o Concello de Barreiros debera esixir da administración provincial que o vial sexa entregado en condicións óptimas ou, no seu defecto, acompañado dunha cantidade suficiente de diñeiro para poder levar a cabo as obras precisas para a súa posta nun estado óptimo.”

Segundo a portavoz municipal “en todo caso, se existe posibilidade de ingresos extraordinarios provintes doutras entidades, deberían destinarse a calquera das numerosas necesidades que hai no concello e non en suplir a actuación que deberá facer a institución ata o de agora titular do vial. Actuar doutro xeito, non vén máis que a confirmar a falla de interese en obter beneficios para o interese xeral das veciñas e veciños por parte do goberno municipal e o desentendemento na realización das máis mínimas xestións para conseguir investimentos que contribúan a mellorar a situación dos viais municipais.”

Desde o BNG xustifican a solicitude deste pleno asegurando que “tendo en conta que o acordo adoptado pola Deputación Provincial debe ser aceptado polo Pleno do Concello de Barreiros, é oportuno, con carácter previo a tal aceptación, especificar as condicións ou negociacións que deban acompañar tal aceptación, xa que do contrario sería asumir innecesariamente obrigas que non corresponden ao Concello de Barreiros.”

O Alcalde barreirense ten agora 15 días para convocar dita sesión e, de non facelo, quedaría automaticamente convocada para o décimo día seguinte.