Dacordo coas bases aprobadas por Resolución de alcaldía de 20 de abril, para creación de bolsas
de Emprego e mais concretamente para a postos de traballo na Escola Infantil municipal,
examínase pola Mesa de Avaliación a documentación presentada polos interesados durante o
prazo establecido.
As persoas que presentaron a documentación en prazo, adxudicanselles os seguintes puntos, de
acordo co baremo de méritos que figuran nas bases:

http://www.concellodebarreiros.com/sites/default/files/acta_bolsa_escola_infantil.pdf

Esta mañá tivo lugar ás portas do Concello de Barreiros unha concentración en recordo de Miguel Ángel Blanco, o concelleiro do PP en Ermua asasinado por ETA en 1997 e en homenaxe a todas as vítimas do terrorismo. No acto, secundado por persoal municipal, participou o alcalde, Alfonso Fuente Parga.

O CONCELLO CAMBIA DE UBICACIÓN A PARADA DE TAXIS PARA MELLORAR A SEGURIDADE DOS USUARIOS.

Barreiros, 6 de xullo de 2017. O Concello procedeu ao cambio de ubicación da parada de taxis para mellorar a seguridade dos usuarios. Antes atopábase situada a carón da N-634 e agora está na propia praza do Concello. Na vella parada creouse unha praza de aparcamento para persoas discapacitadas.

O alcalde, Alfonso Fuente, declarou que “hai uns días, e a proposta dos taxistas de aquí de Barreiros, fixemos un cambio na ubicación da praza da parada de taxis, que estaba á beira da estrada nacional, o cal ocasionaba dificultades á hora de acceder aos taxis, ao abrir as portas, dado o tráfico que hai na N-634. Iso producía que fose incómodo acceder ao taxi”.

O rexedor explicou que “o que fixemos foi habilitar tres lugares na praza do Concello, vai estar moito máis cómodo. Son prazas accesibles de forma que se poderán abrir as portas para subirse ao taxi sen estar sempre pendente se vai pasar un coche ou non pola estrada”.

Fuente Parga dixo que “a distancia entre a praza que había e as novas non dista máis que cinco metros, pero o cambio é substancial dado que na praza que tíñamos para o taxi en San Cosme só collía un vehículo e agora van coller tres”.

O alcalde engadiu que “o sitio onde estaba a parada de taxi vaise pintar para un aparcamento para persoas discapacitadas, facilitando tamén así a saída da rúa de detrás do Concello de cara á nacional, que impedía a visibilidade ese coche sempre estacionado aí”.

Alfonso Fuente subliñou que “é unha mellora que consideramos positiva e que foi pedida tamén polo colectivo de taxistas, no ánimo de mellorar a seguridade para os usuarios do taxi e tamén para a comodidade deles de poder aparcar na praza sen ningún problema”.

O CONCELLO PIDE COLABORACIÓN CIDADÁ PARA QUE O LIXO SE DEPOSITE CORRECTAMENTE NOS CONTEDORES. ESTES DÍAS DETECTÁRONSE RESTOS DE ESCOMBROS, HERBA E CARTÓNS NOS DE ORGÁNICO E PLÁSTICO.

Barreiros, 4 de xullo de 2017. O alcalde, Alfonso Fuente, fai unha chamada á colaboración veciñal para que o lixo se deposite correctamente nos contedores habilitados para este fin. O rexedor denuncia que nos verdes e amarelos se detectou nos últimos días unha presenza importante de cartóns, e engade que “algunha xente está a tirar no contedor verde, herba do segado dos xardíns e tamén pequenos escombros”. A empresa que retira o lixo advirte que, ante esta situación, eses contedores quedarán sen recoller.

O rexedor barreirense explicou que “estes días en Barreiros estamos detectando que, seguramente coa chegada de novos usuarios de vivendas pola tempada estival a maioría dos contedores de lixo, tanto verdes como amarelos, dinos a empresa de recollida que están cheos de cartón”.

Alfonso Fuente declarou que “fomos comprobalo e a verdade é que iso é así. Estanse enchendo con caixas de cartón, co cal despois o lixo tanto orgánico como plástico ten que quedar fora dos contedores e ao lado deses recipientes hai os de cartón que non se están utilizando, que están baleiros, porque podería darse que estiveran cheos tamén e que houbera que depositar o cartón nos outros”.

O alcalde engadiu que “este feito súmase tamén ao que xa levamos tempo detectando, que son os contedores verdes que aparecen cheos de herba de segar xardíns así como restos de pequenas obras. Quería advertir que a empresa de recollida está a deixar eses contedores sen recoller, todos aqueles que detecta que teñen herba ou residuos de pequenas obras que se fan nas vivendas e que se está a botar nos contedores. Está deixando sen recoller para que vexan o que causa o feito de non poder recoller eses contedores. Despois o lixo que debería recoller queda alí”.

Para o alcalde “é triste que haxa que facer isto para que se entenda que hai lixo que non pode ir aos contedores, nin a herba dos xardíns nin os residuos de obra”.

Alfonso Fuente Parga pídelles aos veciños de Barreiros que “todo aquel cartón que se está a depositar nos contedores verdes e amarelos que non se bote, para iso hai uns contedores de cartón. En todo caso eses cartóns deben deixalos ao lado dos contedores verdes porque o que fai a empresa de recollida de lixo é avisar no Concello dese cartón que existe neses puntos de recollida e pásase recoller se non collera nos contedores deses residuos”.

O rexedor insiste en “advertir ese feito, que se utilicen correctamente os contedores de lixo. Sempre, pero sobre todo nestes días que hai gran cantidade de cartón”.