Archivo por días: 1 agosto, 2018
UN GRUPO DE 65 RAPACES E RAPAZAS ESTARÁN DE CAMPAMENTO EN BARREIROS DO 1 AO 11 DE AGOSTO
UN GRUPO DE 65 RAPACES E RAPAZAS ESTARÁN DE CAMPAMENTO EN BARREIROS DO 1 AO 11 DE AGOSTO. PROCEDEN DE TEO, PRETO DE SANTIAGO. ESTA MAÑÁ O ALCALDE DEULLES A BENVIDA. VANSE ALOXAR NAS ANTIGAS VIVENDAS DOS MESTRES NO COLEXIO DE SAN MIGUEL.
Barreiros, 1 de agosto de 2018. O alcalde, Alfonso Fuente, dáballe hoxe a benvida a un grupo de 65 rapaces do concello de Teo que estarán de campamento na localidade ata o 11 de agosto. Alóxanse nas antigas vivendas dos mestres do colexio de San Miguel. O 12 de agosto chegará outro grupo máis numeroso tamén procedente de Teo. E en xullo pasaron por estas instalacións rapaces e rapazas de Xixón. Para o rexedor é importante a promoción turística que se realiza con este tipo de actividades.
Alfonso Fuente declarou que “en Barreiros vimos de recibir a un grupo de rapaces, 65 rapaces e rapazas, que chegan dende o concello de Teo, un concello a carón de Santiago, e que veñen a pasar aquí desde o día 1 ata o 11 de agosto. Isto enmárcase dentro dun programa que ten o Concello de Teo, Un Verán no Cantábrico, e despois do día 11 virá outro grupo tamén deste municipio incluso máis numeroso. Hoxe recibimos a este grupo, indicámoslles o que é o noso concello, e estamos encantados de recibilos”.
O alcalde de Barreiros subliñou que “nós apostamos por este tipo de campamentos despois de ter acondicionado o que eran as vivendas dos mestres no colexio de San Miguel. Teñen alí unhas instalacións perfectas para facer este tipo de campamentos”.
Fuente Parga engadiu que “se sumamos este campamento que hoxe recibíamos de Teo co que despedíamos fai uns días de Xixón con 35 rapaces máis os que van vir na segunda quincena de agosto, e iso sumado tamén aos 160 nenos do campamento da Devesa que están baixando e participando en actividades nas praias de Barreiros, é unha forma tamén de fomentar o turismo. Cando os nenos e nenas están aquí os pais deciden achegarse a estas zonas onde están os seus fillos e coñecer o Cantábrico e, neste caso, Barreiros e toda a Mariña lucense”.
DENUNCIA QUE LEVA AGARDANDO OITO MESES PARA RECIBIR FISIOTERAPIA POR UNHA ENFERMIDADE INVALIDANTE
DENUNCIA QUE LEVA AGARDANDO OITO MESES PARA RECIBIR FISIOTERAPIA POR UNHA ENFERMIDADE INVALIDANTE .
O paciente está diagnosticado de espondiloartrose lumbar, enfermidade dexenerativa e invalidante que afecta aos discos e ás vértebras e que produce importante dor e rixidez ,podendo tamén desencadear espolóns que pincen raíces nervosas e hernias de disco. Por iso é clave a instauración precoz dun tratamento rehabilitador, orientado á eliminación da dor, á melloría da mobilidade e para evitar rixideces .
Este usuario acude ao servizo de Rehabilitación do Hospital da Mariña donde é visto pola facultativa rehabilitadora , que prescribe fisioterapia en clínica concertada o día 26 de outubro de 2017. Oito meses despois desta prescripción ainda non foi chamado . “Como pasaba o tempo e non me chamaban da clínica privada achegueime ata alí a preguntar canto tempo máis tiña que agardar, e cal sería a miña sorpresa cando me contestan que non recibiran a petición”- comenta o paciente abraiado.
Diante desta deixadez da administración o paciente contacta coa UMAR.
Por iste motivo decide acudir á Unidade Móbil de Axuda coas Reclamacións (UMAR), que desde hai tres meses presta axuda a usuari@s, profesionais e colectivos , e decide poñer unha reclamación que lle redacta a devandita unidade e que se presenta no rexistro o día 20 de xuño de 2018, con número de rexistro 2518.
A solución ao gran problema da Rehabilitación e Fisioterapia pasa pola contratación de profesionais e apertura dos ximnasios de Atención Primaria en quenda de tarde.
Desde a Plataforma Sanitaria reiteramos a nosa indignación pola inexcusable falta de previsión que mantén o SERGAS e as Xerencias , que cremos é premeditada e froito dunha estratexia para desmantelar os servizos sanitarios públicos en aras dunha privatización da sanidade que avanza a “toda máquina.” A Plataforma Sanitaria explicou por activa e por pasiva que o gran problema das excesivas agardas podería ter solución se hai vontade política para facelo . “ Esta solución ao gran problema da rehabilitación pasa por contratar en quendas de tarde fisioterapeutas que den uso aos ximnasios que xa están habilitados en quenda de mañá , ou mesmo dotar de persoal a outros coma o de Mondoñedo , que está pechado e os pacientes desa zona vense obrigad@s a desprazarse cara a Foz, ou habilitar un espazo no centro de saúde de Burela e dotalo de material e profesionais para poder implantar o servizo. Gran parte dos problemas de agardas excesivas teríanse solucionado se contratarán oito fisioterapeutas que permitiran abrir as instalacións en quenda de tarde e que reforzaran tamén as tardes no servizo de rehabilitación hospitalario, como ben lle dixemos ao deputado Vega- explica o portavoz da Plataforma, Víctor Vila.
O colectivo en defensa da sanidade pública esixe aos responsables da política sanitaria que deixen dunha vez por todas de enganar á poboación e comecen a facer as dilixencias que sexan precisas para rematar con esta situación que comeza a ser xa un problema de saúde pública e cada día que pasa tensa máis a corda da insatisfacción d@s usuari@s. “ A xente xa non está disposta a aguantar máis nen tampouco vai tolerar máis contestacións subidas de tono por parte da dirección do hospital cando est@s deciden presentar unha queixa ou sobre todo cando acuden á Plataforma Sanitaria para que lles asesore ”- conclúen.