A ALCALDESA DE BARREIROS CONVIDA Á CONSELLEIRA DE MEDIO AMBIENTE A QUE NAS SÚAS VISITAS A BARREIROS COÑEZA AS DEPURADORAS OU ASINE O CONVENIO ANUNCIADO HAI UN ANO PARA URBANIZACIÓN DO CENTRO DE SAN COSME

Ángeles Vázquez acudiu en visita oficial ao municipio barreirense acompañada do portavoz da oposición e sen avisar ao goberno municipal.

Barreiros, 18 de febreiro de 2020. A alcaldesa de Barreiros lamenta que a conselleira de medio ambiente do goberno da Xunta non aproveitara a visita oficial que realizou na mañá de hoxe para convocar ao goberno municipal elixido maioritariamente polas veciñas e veciños de Barreiros e tratar algunhas das cuestións que xa se lle teñen trasladado, como a problemática da depuración das augas residuais ou a existencia real dun convenio para a urbanización de rúas en San Miguel e San Cosme que foi anunciado hai xusto un ano por esta mesma conselleira e do que o goberno actual non tivo noticia.

Ana Ermida lembra que a finais de febreiro do ano pasado, en plena precampaña das municipais, Ángeles Vázquez anunciou un convenio para Barreiros que nunca chegou a ser asinado e do que o actual goberno municipal non ten constancia, pese a tratar de informarse do mesmo.

“É unha pena que a conselleira acudira acompañada do portavoz da oposición e non se puxese en contacto co goberno municipal na súa visita oficial, xa que poderían ter tratado cuestións de relevancia nas que a súa consellería ten competencia e que xa lle foron trasladado por carta no seu momento, sen obter resposta, como a problemática das depuradoras de San Miguel e Reinante e os problemas ambientais que xeran na praia de Arealonga”.

Desde o goberno municipal comprácense de contar con unha nova familia no concello, mais lamentan a realización dun acto propagandístico a raíz da desgracia das persoas e instan á Xunta de Galicia a actuar como ente institucional e non como un aparato propagandístico a disposición do partido gobernante, coa lealdade e o respecto institucional que deben ter todos os gobernos lexítima e democraticamente elixidos, como o de Barreiros.