Os bombeiros da provincia melloran o seu salario, pero seguen sendo os peor pagados de Galicia
O pleno do Consorcio Provincial de Bombeiros aprobou crear un grupo de traballo para o cambio de xestión dos parques, pasando ao público, a partires do 2019
BARREIROS / LA VOZ
Os bombeiros dos parques comarcais da provincia mellorarán o seu salario cos 330.000 euros que este ano achegou a maiores a Deputación de Lugo. Así o anunciou Darío Campos, o presidente do ente provincial, ao rematar o pleno do Consorcio Provincial de Bombeiros, que aprobou por unanimidade a creación dun grupo de traballo no que tamén participe a Xunta para o cambio de xestión dos parques, pasando ao público, a partires do 2019, que é cando rematan os contratos das empresas que actualmente se ocupan da mesma,
«A Xunta de Galicia non ten previsto polo de agora incrementar a súa aportación ao Consorcio noutros 330.000 euros como a Deputación de Lugo para poder equiparar os salarios dos bombeiros de Lugo aos dos seus compañeiros en Galicia», sinalaron dende a Deputación.
«Polo tanto, o Consorcio Provincial de Bombeiros emitirá os informes necesarios para mellorar, e non equiparar (porque a Xunta non fixo a achega que lle corresponde), as condicións salarios destes profesionais en Lugo tan só coa achega que si fixo o Goberno da Deputación de Lugo. Será necesario, por exemplo, e entre outras cousas, modificar o convenio entre traballadores e empresas ou os Estatutos do Consorcio, pois este recolle que dito organismo está financiado ao 50% por Deputación de Lugo e a Xunta de Galicia e, agora, o organismo provincial incrementa a súa aportación con 330.000 euros, que son os que non achega a administración galega, minguando a súa aportación», engadiron.
Dende o BNG, Xosé Ferreiro sinalou que a Xunta continúa a poñer trabas para aportar o 50 % restantes para equiparar os salarios dos bombeiros de Galicia e pon como condición que se inicie o rescate do servicio e pase a ser cento por cento de titularidade pública».