O Concello de Barreiros abre unha nova xanela dixital para presentar os seus atractivos e oferta turística ao mundo

Barreiros, 29 de xuño, 2022. Dende hoxe aquelas persoas que queiran planificar a súa viaxe a este destino dispoñen dunha nova web de turismo, barreirosturismo.gal, que se presenta como un espazo onde coñecer as diferentes alternativas que Barreiros ten para ofrecer a veciños/as e visitantes. Dende os espazos naturais e os seus valores ambientais e xeolóxicos ata o seu diverso e rico patrimonio cultural pasando polas praias ou polas experiencias de ocio e servizos que aquí agardan aos viaxeiros/as.

Entre as novidades máis destacadas atópase o feito de que estará estruturada en tres idiomas: galego, español e inglés -aínda que polo momento se atopa en galego e español aos que se engadirá o inglés en datas próximas-; co fin de facilitarlle o acceso á información tamén ao público internacional nun mundo cada vez máis globalizado.

Outro dos aspectos que incorpora son os apartados adicados á oferta de aloxamentos, restaurantes e bares ou cafeterías. A través das correspondentes pestanas, os usuarios/as poden consultar non só os seus datos de contacto senon tamén facerse unha idea dos seus servizos e/ou instalacións ademais de poder acceder directamente ás súas páxinas web e ubicalos nun mapa interactivo.

A súa creación baseouse en tres eixos principais:

A mellora da imaxe turística a través dunha presentación atractiva visualmente, así como da incorporación de imaxes de calidade e da disposición da información enfocada en facer de Barreiros un lugar que apetece visitar.

A desestacionalización da demanda presentando un Barreiros con potencial para ser visitado durante todo o ano e cunha oferta aloxativa, gastronómica e de actividades de turismo activo de calidade e que aposta pola mellora contínua.

A desfocalización dos fluxos turísticos

Barreiros, 2 de xuño, 2022. O Concello de Barreiros segue a traballar na mellora da súa imaxe e posicionamento turístico, mediante a restauración estética e actualización dos contidos dos paneis turísticos situados en puntos estratéxicos do territorio municipal tales como as praias de Arealonga e Altar, o Santo Estevo do Ermo, ou o Camiño de Santiago, entre outros.

A alcaldesa, Ana Ermida explica que, “deste xeito, ademais da substancial mellora da imaxe conseguida, xa que estes paneis estaban bastante deteriorados, aproveitouse para ofrecer información útil e gráfica sobre os recursos imprescindibles e oferta turística do concello. Así, os e as visitantes, practicamente nun só golpe de vista, poden facerse unha idea global de todo o potencial turístico de Barreiros. Por outra banda, remiten tanto aos servizos presenciais de información turística como ás ferramentas online para que os e as viaxeiras poidan ampliar información se o desexan”.

A colocación dos paneis foi posible grazas á colaboración entre o persoal de turismo e o de obras, que se encargaron dos contidos e da colocación, respectivamente.

Neste senso, o Concello tamén está a traballar na mellora de sinais e paneis puntuais tanto no Camiño de Santiago como no Santo Estevo do Ermo atendendo así ás demandas dos e das visitantes e á lóxica e necesaria actualización da imaxe e da información proporcionada. Melloras que en breve estarán finalizadas.

Ermida subliñou que “estes traballos únense tanto ao recente reacondicionamento e sinalización do novo trazado da Ruta Lagoa de Pallares cuxa información está dispoñible na web municipal entre outras plataformas a nivel xeodestino, como á planificación de novidades de cara ao verán que, agardan, redunden nunha imaxe turística actualizada e no posicionamento de Barreiros como destino para visitar en calquera época do ano aproveitando a súa riqueza natural e cultural”.

https://actualidadbarreiros.info/barreiros-presenta…/

Barreiros, a 27 de agosto de 2021. Por unha banda realizouse un vídeo promocional do destino baseado na paisaxe e na tranquilidade e, por outra, elaboráronse unhas postais dixitais descargables para que os viaxeiros se leven un recordo de Barreiros e, ademais, as poidan compartir cos seus achegados divulgando así os principais atractivos turísticos do municipio.

Coa idea de fomentar a chegada de turistas en tempada baixa e incrementar os días de estancia así como de premiar a elección deste destino, o Concello optou por lanzar estas dúas ferramentas de promoción precisamente agora, ao rematar o verán. Pois, as suaves temperaturas, a práctica de actividades na natureza, a tranquilidade e o contacto coa cultura local propician a chegada de viaxeiras e viaxeiros moito máis alá dos meses de xullo e agosto.

En contra do que se pensa, o litoral da Mariña Lucense é unha das zonas costeiras de Galicia onde menos chove ao longo do ano -segundo os Informes Climatolóxicos Anuais elaborados por Meteogalicia-.

Vídeo promocional turístico “Barreiros queda en ti”.

Céntrase na paisaxe, mais tamén en sensacións como a liberdade, a paz, a conexión coa natureza e coa cultura do lugar. En liña coa filosofía do Turismo Slow, das viaxes conscientes e do vínculo coa esencia dun territorio onde parece que o tempo se detén.

Dende o Concello agradecen a colaboración e o traballo realizado por tódalas persoas que contribuíron á gravación e posterior edición deste vídeo, especialmente aos/as figurantes e ao Servizo de Audiovisuais da Deputación de Lugo.
Enlace ao vídeo: https://www.concellodebarreiros.gal/gl/turismo/video-barreiros-queda-en-ti

Postais dixitais

Trátase dunha forma de premiar ás persoas que nos visitan e de que estas compartan a súa viaxe e os encantos de Barreiros con amigos e familia.

Están dispoñibles para a súa descarga de balde na sección de turismo da páxina web municipal.

Barreiros, 31 de marzo, 2021. A Asociación de Hostalería de Barreiros acaba de editar un folleto turístico en formato papel e en formato dixital, para promover os atractivos turísticos do municipio e da contorna. Trátase dunha publicación de catro corpos, que presenta Barreiros como destino turístico -dentro do xeodestino A Mariña Lucense- comunicando os valores que o diferencian, como a súa historia, a súa costa paradisíaca -ideal no contexto de sol e praia pero tamén para a realización de actividades deportivas e de natureza- , ou un interior rico e diverso atravesado polo Camiño de Santiago do Norte e con espazos tan emblemáticos dentro da Mariña, como son a “ Fervenza de Santo Estevo do Ermo”, o círculo lítico “A Roda” ou o monte Comado.

O ano pasado, a asociación elaborou tamén carteis de tamaño medio en cartón pluma que, ademais de promover os atractivos da zona, permitían acceder -a través de códigos QR- ás páxinas web dos establecementos asociados e a outros elementos de interese como as páxinas de reservas da Praia de As Catedrais e de Fuciño do Porco, a web oficial da Mariña Lucense Turismo ou á sección de turismo do Concello de Barreiros.

Estas accións pretenden achegar valor aos visitantes do municipio, mellorar a súa experiencia de viaxe e colaborar na promoción de Barreiros, dando a coñecer ademais, os servizos de hostalería que aglutina a agrupación.