O BNG SOLICITARÁ QUE SE HABILITEN BOCAS DE INCENDIO NAS PARROQUIAS DE BARREIROS.

A veciñanza das parroquias do interior denuncian o esquecemento e abandono ao que está sometida por parte do goberno municipal.

Barreiros, 14 de febreiro de 2015. O BNG de Barreiros reuniuse nesta semana coas veciñas e veciños de San Xusto e Vilamar. Nestas reunións, nas que a formación nacionalista recolle as inquedanzas e propostas da xente, “o sentimento unánime que se amosa é o de sentirse completamente abandonados polo goberno municipal “, afirma a portavoz municipal, Ana Ermida. “A xente non comulga con rodas de muíño e cando se leva catro anos sen facer nada polas parroquias os anuncios electoralistas de última hora non son cribles”, aseguran desde o BNG.

Nestas reunións “a atención adoita centrala o estado das vías municipais, que é de total abandono e non como consecuencia das condicións meteorolóxicas, se non como consecuencia da falla de mantemento e atención que veñen sufrindo desde hai anos”, expón Ana Ermida.

“Con todo, sempre se recollen propostas interesantes, como a que nos trasladaron en San Xusto a respecto da posibilidade de habilitar bocas de incendio nas que coller auga para o camión de bombeiros ou cisternas no caso de ser preciso. Segundo a veciñanza, esa cuestión xa foi trasladada no seu momento sen que tivera ningún tipo de resposta”, informan desde a formación frontista.

“Desde o BNG valoramos moi positivamente esa proposta e solicitaremos no concello que se analice a viabilidade de realizar esa pequena inversión nas parroquias, que suporía un importante avance na seguridade da veciñanza para casos de incendio, ao igual que a construción de depósitos naqueles lugares nos que non existen”, asegura Ana Ermida.

Desde o BNG, facéndose eco das demandas veciñais, insisten en reclamar “maior atención ao goberno municipal sobre o estado da rede viaria, a deixar de buscar culpables fóra e a asumir a responsabilidade de quen leva anos sen atender a camiños, estradas e pistas, a pesar de contar con un concelleiro delegado de obras que cobra todos os meses do concello por, na teoría, facer este tipo de traballo.”

O BNG DE BARREIROS REUNIRASE NAS DÚAS VINDEIRAS SEMANAS COAS VECIÑAS E VECIÑOS DAS PARROQUIAS DO INTERIOR PARA FALAR DE PROPOSTAS PARA O SEU LUGAR

O luns 2, ás 21 horas, convocan á veciñanza de Cabarcos para manter un encontro no centro social.

Barreiros, 31 de xaneiro de 2015. O BNG comezará o vindeiro luns con unha rolda de reunións nas parroquias do interior do concello para coñecer as necesidades das veciñas e veciños e recoller as propostas que poidan incluír no programa electoral para as eleccións municipais de maio.

A formación nacionalista considera que é urxente atender as necesidades das persoas que viven nestas parroquias, que son sempre esquecidas polo goberno municipal do PP e que só se igualan ao resto do concello para as obrigas, sen que teñan os mesmos dereitos.  A portavoz municipal do BNG, Ana Ermida, sinala que “as parroquias que non son costeiras teñen moitísimas máis carencias ca estas. En servizos, como o saneamento ou a recollida de lixo, pero tamén en atencións, como o mantemento das estradas e camiños ou dos seus locais sociais”, explica.

“Desde o BNG cremos que quen mellor sabe das necesidade das parroquias é quen vive nelas cada día e se atopa con problemas e dificultades que non son atendidas”, asegura Ana Ermida. “Por iso nos queremos achegarnos a todas as parroquias, falar directamente coa xente e escoitar as súas preocupacións e demandas, e tamén trasladarlles as nosas alternativas, para que entre todas e todos poidamos determinar mellor que precisa Barreiros.”

Tras a negativa do Partido Popular a acordar iniciar con urxencia os trámites para dotar de saneamento as parroquias do interior do concello, as veciñas e veciños amosaron o seu malestar, ao considerar que “o concello discrimina ás persoas en función de onde vivan.”

Fronte a ese modo de actuar, o BNG aposta por escoitar as súas inquedanzas e incluír as súas demandas entre as propostas de futuro que precisa Barreiros.  A primeira cita terá lugar o vindeiro luns, 2 de febreiro, ás 21 horas no centro social de Cabarcos. Achegaranse a Vilamartín grande o mércores 4 de febreiro e, na seguinte semana, xuntaranse en San Xusto e Vilamar.

Desde o BNG fan un chamamento a que “a xente participe, trasladando os seus problemas, necesidade e tamén ideas para mellorar a calidade de vida destas veciñas e veciños que non poden ser tratados de diferente xeito por vivir nunha zona ou outra do concello, como está a pasar actualmente co goberno do Partido Popular”.

Lugo 27 de xaneiro de 2015.-

O presidente do PP de Lugo, José Manuel Barreiro, informou este martes que José Alfonso Fuente Parga, será o candidato do PP á alcaldía de Barreiros nas próximas eleccións municipais.

O presidente dos populares lucenses destacou a experiencia do rexedor e a súa capacidade de xestión e animou a conseguir de novo o amplo respaldo dos veciños, que nas últimas lexislaturas, segundo lembra Barreiro, confiaron no Partido Popular e na figura do seu alcalde, Alfonso Fuente Parga.

José Manuel Barreiro eloxiou tamén a total entrega e compromiso do alcalde cos seus cidadáns, sacando nesta lexislatura, adiante propostas de importante demanda en Barreiros como foron melloras no abastecemento de auga e en redes de saneamento, a posta en marcha do ximnasio municipal, o mantemento da gardería ou o servizo de axuda no fogar sen lista de espera.

Traxectoria política
Fuente Parga accede á alcaldía no ano 2005, despois do falecemento de Luís Fraga Leiro, e encabezou as candidaturas do Partido Popular na localidade dende o ano 2007, acadando sempre maioría absoluta. O seu inicio na actividade pública remóntase xa ao ano 1999, sendo alcalde da localidade Manuel Díaz Sampedro, e facéndose fronte da responsabilidade da secretaría das Escolas Deportivas de Barreiros.

Datos persoais
O alcaldable naceu en Benquerencia, municipio de Barreiros, o 10 de xuño de 1971. Ten, polo tanto, 43 anos, casado e con dous fillos. Con estudos en empresariais, traballou durante 16 anos como asesor fiscal e contable.

Barreiros, 22 de xaneiro de 2015. O BNG de Barreiros levará ao pleno do vindeiro luns unha petición de respaldo á iniciativa xurdida nos últimos días para recuperar montes próximos ao Santo Estevo e convertelos en referente turístico .

“Despois de coñecer a solicitude feita pola asociación Irmandade Augas Santas na pasada semana, consideramos oportuno que a totalidade da corporación municipal se pronuncie ao respecto e, desde logo, que se acade un compromiso do goberno municipal de iniciar as actuacións precisas para a posta en valor desta paraxe natural”, explica a portavoz municipal, Ana Ermida.

Desde o BNG recordan que en varias ocasións desde o ano 2000, se adoptaron acordos para a conservación e recuperación da zona a raíz de iniciativas do grupo municipal nacionalista, pero lamentan que as actuacións ao respecto por parte do goberno local foron practicamente inexistente.

Para o BNG “a posta en valor dos espazos naturais que ten o concello, como o Santo Estevo ou o río Masma, sempre foi unha prioridade e unha oportunidade para a diversificación turística e a promoción dunha oferta de ocio respectuosa co medio ambiente”, explica Ana Ermida. “Desde logo que o noso grupo apoia a iniciativa desta asociación para a creación dun espazo natural máis amplo e así o solicitamos en pleno hai poucos meses, cando pedimos que se iniciaran as xestións para a declaración do Santo Estevo como Espazo Natural de Interese Local.”

Desde o BNG aseguran que “é unha oportunidade que non podemos deixar pasar, aproveitar todos os recursos e, sobre todo, o interese social que esperta esta iniciativa; especialmente se a inversión que se debe realizar non é moita e os resultados poden ser de moito interese.”

Por esta razón, a formación nacionalista instará ao goberno municipal a que realice as investigacións oportunas para comprobar o estado dos montes e que inicie as xestións para convertelos nun espazo natural e turístico, así como que axilice a declaración da zona como Espazo Natural de Interese Local, tal e como foi aprobado,a iniciativa do BNG, hai poucos meses.

Un saúdo,

BNG Barreiros

NOTA DE PRENSA DO BNG DE BARREIROS

O PARTIDO POPULAR DEIXA BARREIROS ENDEBEDADO ATA 2032, TENDO QUE PAGAR MÁIS DE 5 MILLÓNS DE DÉBEDA.

O goberno municipal incrementa a recaudación de impostos para incrementar o coste de persoal

Barreiros, 20 de xaneiro de 2015. Na tarde de onte aprobáronse en Barreiros os orzamentos municipais para o ano 2015. O BNG votou en contra dos mesmos, xa que son uns orzamentos que reflicten a mala xestión do goberno do PP e que condenan ás veciñas e veciños a non recibir ningún novo servizo nin investimento neste ano.

No ano 2015, a  recaudación por impostos e taxas municipais subirá un 20% con respecto ao 2014, o que se corresponde cunha suba do 10% en gastos de persoal, que supón practicamente a metade do orzamento deste ano, “nunha práctica xa habitual no concello de Barreiros en ano electoral”, sinala a portavoz municipal, Ana Ermida.

“O que reflicten os orzamentos aprobados onte é unha situación de emerxencia, na que o concello recauda cartos das veciñas e dos veciños para pagar a débeda e manter aberto o concello: persoal e gasto diario. Non hai investimentos importantes para o futuro, non hai oferta de novos servizos e non existen ningunha partida coa que se intente garantir a calidade de vida da xente”, afirman desde o BNG.

A formación nacionalista anunciou que presentará alegacións a este orzamentos que, ademais califican de “insolidarios e fóra da realidade actual”. Ana Ermida explicou que se se destinan máis de 6.000€ a gastos protocolarios, 8.000€ a dietas do equipo de goberno ou 40.000€ para asistencia xurídica e nin un só euro para atender as situacións de necesidade social pola que están pasando moitas das familias en Barreiros.

Desde o BNG califican estes orzamentos como “nefastos” para a xente, “son uns orzamentos para manter un concello que non aporta nada ás veciñas e veciños: nin novos servizos, nin melloras nos existentes, nin atención social… Só recaudan para manter persoal e gasto corrente e para pagar a débeda dunha xestión que, desde 2005, deixa ao concello en número vermellos.”