Archivo de la categoría: Depuradora

Depuradora de San Miguel

O PP interesase sobre a resposta do Concello de Barreiros ao ofrecemento da Xunta de colaborar na obra da depuradora de San Miguel de Reinante

Barreiros, a 19 de xuño de 2021. O Partido Popular interesase sobre a resposta do Concello de Barreiros ao ofrecemento da Xunta de Galicia de colaborar na obra da depuradora de San Miguel de Reinante.

Os deputados mariñáns rexistraron unha pregunta sobre este asunto no Parlamento de Galicia. “Queremos saber a resposta da alcaldesa de Barreiros aos ofrecementos da Xunta de Galicia de apoio técnico e financeiro e outras actuacións previstas polo Goberno galego en relación coa competencia municipal de abastecemento ou saneamento de auga”, sinalan os deputados populares.

Os núcleos de San Miguel e Reinante carecen de sistemas adecuados de depuración, pois as respectivas depuradoras están obsoletas, e os problemas quedan en evidencia, sobre todo en tempada estival polo aumento da actividade turística.

“Desde o Partido Popular queremos agradecer a boa disposición do Goberno galego nesta tema de vital importancia para os veciños e veciñas de San Miguel de Reinante tendo en conta, ademais, que o abastecemento e saneamento de auga é unha competencia municipal”, manifestan os populares.

O BNG urxe ao Ministerio a construír unha nova EDAR en Barreiros

Publicado por Álvaro Vizoso Vázquez 6 min 
O BNG urxe ao Ministerio a construír unha nova EDAR en Barreiros
29 Maio, 2021 Imprimir Email
Share0Tweet
Madrid, 27 de maio de 2021. O deputado do BNG no Congreso, Néstor Rego, rexistra iniciativas na cámara baixa tras unha xuntanza coa alcaldesa do Concello de Barreiros, Ana Ermida, para reclamar ao MITECO que inclúa a construción dunha nova Estación Depuradora de Augas Residuais no municipio entre as súas obrar prioritarias.
Considera que se trata dunha obra de interese xeral pois evitaría as verteduras directas ao mar que provocan graves problemas de salubridade nas praias de Arealonga, Reinante e San Miguel.
O concello de Barreiros, de 3.000 habitantes e que en temporada de verán chega a triplicar este número, sofre as consecuencias do boom inmobiliario e descontrol urbanístico na década dos dous mil en que se chegaron a proxectar e construírse preto de 3.000 vivendas sen os servizos necesarios para darlles cobertura. Na actualidade, o municipio mariñán precisa dunha nova EDAR que evite as verteduras ás praias e provoca graves problemas de salubridade nos meses do verán.
“Os principais puntos de vertedura atópanse en zonas moi próximas ás praias, preto de lugares de interese natural e turístico como pode ser Augas Santas ou mesmo As Catedrais” apunta Rego. “Isto provoca un impacto negativo no turismo e supón un risco para a saúde pública tal e como demostran as analíticas de calidade das augas que seguen a lanzar valores de contaminación microbiolóxica por enriba dos valores considerados como normais” subliña o deputado nacionalista.
De facto, nos meses de maior temperatura, tense que prohibir o baño en numerosas praias como a de Arealonga, Reinante ou San Miguel. Esta situación, para a formación nacionalista, “é insostíbel” polo que exixen ao Ministerio para a Transición Ecolóxica e Reto Demográfico que atenda as solicitudes trasladadas polo Concello de Barreiros.
“O MITECO ten que incluír entre os proxectos prioritarios, como obra de interese para o conxunto do Estado, a construción dunha nova Estación Depuradora de Augas Residuais no Concello de Barreiros que evite as verteduras directas ao mar que provocan graves problemas de salubridade nas praias de Arealonga, Reinante e San Miguel” subliña o deputado do BNG.
O elevado custo da obra, que se calcula pode supoñer uns 3,5 millóns de euros, “non é asumíbel para o concello de Barreiros”, polo que é necesario que outras administracións participen no seu financiamento.
Así, o Ministerio de Transición Ecolóxica debe atender as solicitudes trasladadas desde o Concello de Barreiros e apoiar a nova EDAR, necesaria para a saúde pública e o medio ambiente evitando unha deterioración maior do ecosistema costeiro neste concello mariñán.

A Deputación de Lugo adxudica por máis de 1M€ melloras en estradas provinciais de 9 concellos, entre eles Barreiros, Riotorto, Trabada e Lourenzá

A Deputación de Lugo adxudica por máis de 1M€ melloras en estradas provinciais de 9 concellos, entre eles Barreiros, Riotorto, Trabada e Lourenzá

18-12-20

 Lugo, 18 de decembro de 2020. O Presidente da Deputación de Lugo, José Tomé Roca, informou este venres de que a Xunta de Goberno aprobou a adxudicación de obras de mellora en estradas provinciais por máis de 1M€ en nove concellos da provincia. “Seguimos demostrando o noso compromiso coa mellora da mobilidade”, subliñou José Tomé.

As obras efectuaranse en vías que discorren polos municipios de Barreiros, Monforte, Bóveda, Riotorto, Trabada, Lourenzá, Vilalba, Xermade, e A Pastoriza. “De norte a sur, onde gobernan os 3 grupos políticos con representación na Corporación provincial”, subliñou.

En Barreiros, adxudicáronse por 91.300€ os traballos de mellora da estrada provincial LU-P-0610, coñecida como a estrada da Costa. “Vanse renovar dous quilómetros, entre os puntos quilométricos 3,400 e 5,400, cun prazo de execución de 9 meses”, detallou o Presidente, e engadiu que esta estrada ten moita importancia estratéxica na Mariña porque é a que discorre paralela ás praias de Barreiros e chega ata a das Catedrais, en Ribadeo. “Melloraremos outro tramo desta vía na próxima anualidade, co compromiso de que neste mandato quede totalmente renovada esta estrada. A día de hoxe, só faltarían por renovar 4 quilómetros”, indicou José Tomé.

En Monforte de Lemos, adxudicáronse por 133.100€ as obras da vía que une o núcleo de Monforte con Currelos, no concello do Saviñao, a LU-P-3202. As actuacións desenvolveranse entre os quilómetros 4 e 6,8. O prazo de execución é de 9 meses.

En Bóveda, a Xunta de Goberno aprobou a adxudicación de obras na estrada LU-P-0907, a vía que une a parroquia de Teilán co concello de Paradela. Son un total de 3 quilómetros de vía, entre o punto quilométrico 0 e o 3,2. Estes traballos teñen un orzamento de máis de 93.000€ para renovar o firme da estrada. O prazo de execución é de 9 meses.

Tamén foi aprobada á adxudicación por máis de 152.500€ do proxecto para renovar o firme da LU-P-5506, que comunica os concellos de Trabada, A Pontenova e Lourenzá, dende o quilómetro 0 ata o 4,1. Con estas obras, a estrada de Augaxosa a Trabada queda renovada de maneira íntegra.

En Vilalba, o Presidente anunciou a adxudicación das obras de mellora da vía LU-P-6510. Trátase da estrada que conecta os núcleos de Panchita e Oleiros, na que a Deputación inviste 150.000€.

En Xermade, déuselle o visto bo á adxudicación dunhas obras de mellora na vía LU-P-2204, a estrada que une Momán coas Pontes. Estes traballos execútanse en case quilómetro e medio desta vía, entre os puntos quilométricos 7,000 e 8,340 e teñen un orzamento de máis de 250.000€. O prazo de execución é de 6 meses. “Con esta última actuación, a Deputación mellorará máis de 8 quilómetros dos 9,7 que ten de lonxitude a vía, co que só restaría pouco máis dun quilómetro para o seu acondicionamento íntegro, cuxo proxecto será redactado no vindeiro ano 2021”, avanzou o Presidente.

Na Pastoriza, adxudicouse a rehabilitación do firme da estrada LU-P-1106, que vai de Castro de Rei a Campo do Oso, pasando por Reigosa. Ten un investimento de 167.180€. Melloraranse uns 4 quilómetros desta estrada, entre os puntos quilométricos 16,9 a 20,4. O prazo de execución de 9 meses.

Desfibriladores
Por outra banda, na Xunta de Goberno deste venres tamén se licitou por un importe de 60.000€ o contrato de subministro de 49 desfibriladores semiautomáticos, no marco da campaña Lugo, Provincia Cardioprotexida.

Esta licitación é por dous anos e forma parte desta iniciativa da institución provincial coa que “dotaremos de desfibriladores aos 49 concellos que decidiron sumarse á campaña, e que leva aparellada a formación necesaria a persoal municipal para o manexo dos aparatos desfibriladores”, detallou o Presidente.

Deste xeito, a Deputación contribuirá a mellorar a protección dos veciños e veciñas da provincia ante posibles fallos cardíacos cunha medida que vai na liña do que recomendan as organizacións de profesionais sanitarios. Tomé Roca indicou que “é moi importante contar con equipos desfibriladores nas instalacións e espazos públicos para reducir ao mínimo posible o tempo de reposta ante unha parada respiratoria. Estamos falando da diferencia entre a vida ou graves secuelas, ou mesmo a morte”.

Zonas verdes
O mandatario provincial explicou, ademais, que na sesión do Goberno deste venres se aprobou a renovación do encargo á empresa pública Tragsa para os traballos de conservación e mantemento das zonas verdes. “Facémolo por 2 anos, 2021 e 2022, por un importe de 1,7 millóns de euros para poder atender máis de 82 hectáreas de zonas verdes repartidas por toda a provincia”.

En materia de contratos, licitouse por un importe de 41.300€ ao contrato por lotes dos seguros para a cobertura integral da flota de catamaráns da Deputación de Lugo durante dous anos. Este seguro inclúe a responsabilidade civil, o seguro obrigatorio de viaxeiros e o seguro de cascos das embarcacións e equipos.

Rehabilitación do Castelo de Doiras
En materia de convenios, hoxe aprobouse unha achega de 95.000€, en dúas anualidades, á Fundación Xosé Soto de Fión, para colaborar nas obras de conservación e mellora do Castelo de Doiras, en Cervantes. Este monumento, declarado Ben de Interese Cultural (BIC), é un elemento patrimonial e turístico con gran poder para captar visitantes á comarca dos Ancares. Por este motivo, “dentro da nosa aposta por impulsar o turismo interior da provincia e por conservar o patrimonio cultural, financiamos as actuacións que permitan un mellor mantemento, para poñelo en valor e potencialo como referente turístico”, explicou o Presidente.

Concretamente, faranse labores de limpeza e roza da vexetación, reposición de fiestras, reparación e restitución de escaleiras, portas e drenaxe do edificio, instalación de falsos teitos en madeira e varandas e dotación de novos puntos de luz exterior. Ademais, eliminaranse restos da construción, como azulexos e baldosas e instalaranse elementos naturais como pedra e madeira.

Por outra banda, este convenio recolle traballos de investigación e divulgación, como a elaboración dun dossier informativo; a colocación de paneis explicativos para os visitantes, así como a obriga de establecer uns horarios de apertura ao público, no que haberá un guía turístico.

Local social en Foz e belén xigante de Viveiro
Este venres tamén se lle deu o visto bo a un convenio bianual de 43.000€ para a construción dun local social para asociación de veciños Río de Ouro, da parroquia de San Acisclo, no concello de Foz. Esta nova infraestrutura, que vai estar adosada ao actual edificio da Escola de San Acisclo, aumentará a superficie útil da antiga escola e proporcionará unha maior funcionalidade ó edificio, aumentando o seu aforo, moi limitado neste momento, e permitindo realizar unha serie de actividades que actualmente non se poden facer por falta de espazo, como obras de teatro, pequenos concertos, sesións de cine ou faladoiros, entre outras.

A Xunta de Goberno tamén aprobou unha achega de 70.000€ en dúas anualidades para o Concello de Viveiro co fin de sufragar os gastos de instalación do Belén Xigante. Tomé Roca subliñou que “este Belén é un elemento que supón un verdadeiro revulsivo económico durante as festas de Nadal para o comercio e a hostalería da comarca, que tanto están a sufrir as consecuencias derivadas da pandemia do coronavirus”.

Sala de despece na Fonsagrada
Así mesmo, foi aprobado un convenio coa Sociedade Club de Caza e Pesca da Fonsagrada por importe de 22.300€. O obxectivo é mellorar e acondicionar a sala de despece de produtos cinexéticos.

En concreto, con esta achega a sala pasará a contar cunha nova envasadora ao vacío para pezas grandes, e cunha serra que permitirá cortar pezas e ósos, incluso conxelados. “Con estas dotacións mellorarase a rendibilidade, eficacia e presentación dos produtos elaborados”, explicou Tomé Roca na rolda de prensa.

Declaracións da alcaldesa sobre a construción dunha nova estación depuradora de augas residuais en San Miguel

Declaracións da alcaldesa sobre a construción dunha nova estación depuradora de augas residuais en San Miguel 👇🏻

“A COLABORACIÓN INSTITUCIONAL PARA A DEPURADORA DEMÓSTRASE CON APORTACIÓN ECONÓMICA SUFICIENTE”, AFIRMA ANA ERMIDA.

A alcaldesa de Barreiros, Ana Ermida, lémbralle ao concelleiro do Partido Popular en Barreiros, José Manuel Gómez Puente, que foi concelleiro de goberno na área de medio ambiente durante catorce anos, que “non é o momento de facer política coa necesidade de depuración de augas residuais; se non de aportar as solucións que non executaron mentres gobernaron.”
Ante as declaración vertidas no día de onte polo concelleiro popular, Ana Ermida lémbralle que o Concello de Barreiros ten un orzamento total de pouco máis de 3,5 millóns de euros. E que a día de hoxe continúa a pagarse unha débeda que se xerou durante os seus anos de goberno, o que afoga a economía municipal.
“Se a construción da depuradora fose unha cuestión de mera colaboración, entendemos que o que ata hai pouco máis dun ano era responsable de medio ambiente en Barreiros xa a tería construído. E máis cando de 14 anos de goberno, coincidiron 10 de goberno popular na Xunta”, afirma a alcaldesa.
Ermida pídelle ao Partido Popular que deixe de tentar embarrar a política municipal e que xa que non fixeron nada en 14 anos “que, cando menos, deixen traballar a quen o está a facer”.
A alcaldesa explicou que teñen contactos con Augas de Galicia e coa Consellería e que están tratando de solucionar unha cuestión de suma importancia que o Partido Popular mentres gobernou Barreiros non tivo ningún interese en atallar.
Segundo informou a alcaldesa, ten tamén solicitada tanto telefonicamente como por escrito, unha entrevista co novo delegado da Xunta en Lugo coa intención de trasladarlle as necesidades do municipio, ao igual que xa fixera co anterior delegado no momento da chegada á alcaldía.
“Se Gómez Puente está tan preocupado por este tema, que contribúa a implicar á Xunta de Galicia gobernada polo seu partido, explicándolles a situación na que se atopa o municipio e a imposibilidade real de asumir un custo de máis dun millón de euros para Barreiros, e máis tras a súa xestión, para que a súa implicación sexa maior, coma noutros concellos como Abegondo, onde financian o 83% do orzamento”, conclúe Ermida.

O PP de Barreiros defende a colaboración institucional para levar a cabo a obra na depuradora de San Miguel de Reinante

O PP de Barreiros defende a colaboración institucional para levar a cabo a obra na depuradora de San Miguel de Reinante

09-10-20

 Barreiros, a 9 de outubro de 2020. O Partido Popular de Barreiros considera beneficioso para os veciños de Barreiros a colaboración entre as distintas administracións porque permite mellorar infraestruturas e facilita a prestación de servizos. Así, amosan o seu apoio á colaboración institucional de cara a levar a bo fin a obra na depuradora de San Miguel de Reinante.

O concelleiro e deputado provincial José Manuel Gómez Puente subliña que “a Xunta de Galicia xa ten amosado o seu compromiso de aportar a terceira parte do orzamento necesario para a construción da depuradora de augas residuais”. É dicir, a Xunta cofinanciará a obra na mesma porcentaxe que o Concello e a Deputación Provincial. Ademais, “o Goberno galego ofreceu o seu apoio técnico ao Concello co obxectivo de acadar a solución máis axeitada para a mellora do saneamento de San Miguel”. Hai que recordar que tanto o abastecemento de auga coma o saneamento son materias de competencia municipal.

A Xunta, disposta a cofinanciar o saneamento en Barreiros

A Xunta, disposta a cofinanciar o saneamento en Barreiros

Proponlle á alcaldesa, Ana Ermida, unha xuntanza coa Deputación e o Concello

PEPA LOSADA

A Xunta ofrece ao Concello de Barreiros cofinanciar as obras de saneamento de San Miguel de Reinante na mesma porcentaxe que a Deputación de Lugo, e proponlle á alcaldesa, Ana Ermida, unha xuntanza coa representación das tres Administracións con vontade real de participación técnica e financeira como solución aos problemas de depuración do municipio.

A Consellería de Infraestruturas e Mobilidade, Ethel Vázquez, vén así de dirixirse á alcaldesa para amosar a vontade de colaboración de Augas de Galicia.

O CONCELLO REMATOU AS OBRAS NA TRAÍDA DA AUGA NA ZONA DE PUMARÍN. AGORA SÓ QUEDA PENDENTE A REPOSICIÓN DO FIRME NA ESTRADA

O CONCELLO REMATOU AS OBRAS NA TRAÍDA DA AUGA NA ZONA DE PUMARÍN. AGORA SÓ QUEDA PENDENTE A REPOSICIÓN DO FIRME NA ESTRADA. La imagen puede contener: 3 personas, personas de pie, árbol, exterior y naturaleza

Barreiros, 21 de febreiro de 2019. O Concello ven de realizar obras na traída de auga na zona de Pumarín. Alí substituíuse máis dun quilómetro da vella rede de fibrocemento, na que se rexistraban avarías con certa frecuencia. O alcalde, Alfonso Fuente, e o concelleiro de Obras, Lorenzo Penabad, visitaron os traballos que rematarán coa reposición do firme.

O rexedor sinalou que “esta actuación modifica a traída de auga na zona de Pumarín, case un quilómetro de substitución da vella rede de fibrocemento. Continuamos co cambio de tubaxes que xa iniciamos fai uns anos. Esta era unha obra que estaba dentro da adxudicación da depuradora. Era unha mellora igual que a que se fixo en Benquerencia desde a N-634 ata Agolada, e agora substituíuse esta. Eran dúas traídas moi importantes porque a parte de ser en fibrocemento, producíanse moitas avarías nesa zona e moitos cortes no subministro”.

O alcalde declarou que “neste momento falta a reposición do firme da estrada, pero os propios veciños me trasladaban que están bastante contentos con esta obra porque recolocaron os contadores e colocáronos ao pé da vía para facilitar a lectura dos mesmos”.

Alfonso Fuente salientou que “continuamos traballando nesa mellora da rede de abastecemento”.

O alcalde visitou Pumarín acompañado do concelleiro de Obras, Lorenzo Penabad.

FUENTE PARGA VISITOU AS OBRAS DA DEPURADORA DE CELEIRO DE MARIÑAOS

FUENTE PARGA VISITOU AS OBRAS DA DEPURADORA DE CELEIRO DE MARIÑAOS, QUE ESTÁN A PIQUES DE REMATAR. O INVESTIMENTO ASCENDE A UN MILLÓN DE EUROS.

Barreiros, 19 de febreiro de 2019. O alcalde, Alfonso Fuente, visitou esta mañá as obras da depuradora de Celeiro de Mariñaos, que entrará en funcionamento en breve. O investimento realizado ascende a 1 millón de euros.

O rexedor contou que “visitei as obras da depuradora, da Etap, en Celeiro de Mariñaos para ver como ían. Esperamos que nuns días poidan estar rematadas xa totalmente esas obras, para poder poñer xa en funcionamento a nova depuradora e evitar así o que viña pasando, que cando o río baixaba revolto, por choivas ou por obras no cauce, iso ocasionaba que a auga saíse con turbidez”.

Alfonso Fuente engadiu que “para eliminar todo isto, unha vez se poña en marcha esta nova depuradora, iso xa quedará solucionado. Así mesmo amplía a capacidade de produción de auga potable, e tamén se aumentou o depósito de cabeceira. Tiñamos un depósito de 900 metros cúbicos e agora xa contamos cun depósito de 2.000 metros cúbicos”.

O alcalde lembrou que “o investimento está en torno a 1 millón de euros, que creo que nos vai dar moita mellora en toda a rede de abastecemento de auga do noso concello”.