Barreiros, 22 de setembro de 2015.- O Concello de Barreiros, a través do Departamento de Servizos Sociais, ten programado para o vindeiro mes de outubro un curso de manualidades que terás tres localizacións diferentes no municipio.
Os martes e os venres celebrarase en horario de 15:30 a 19:30 horas no Canteiro, en San Pedro; os mércores terá lugar no mesmo horario no local social de San Xusto e os xoves nas escolas de Celeiro de Mariñaos, tamén na mesma franxa horaria que os anteriores.
CELSO DOURADO FAI UN BALANCE MOI POSITIVO DA ASISTENCIA DO PÚBLICO ÁS ACTIVIDADES DE VERÁN NO EIDO DOURADO, QUE PREVÉ CONTINUAR E AMPLIAR O ANO QUE VÉN.O ESPAZO PECHA A SÚAS PORTAS ESTA TEMPADA O VINDEIRO DOMINGO, 6 DE SETEMBRO.
Barreiros, 2 de setembro de 2015. O próximo domingo, 6 de setembro, pecha as súas portas esta tempada o Eido Dourado, o espazo que o artista barreirense Celso Dourado xestiona fronte á praia da Pasada. Logo das visitas realizadas á exposición plástica e a asistencia de público aos Concertos ao Solpor programados durante os domingos do verán, Celso Dourado fai un balance moi positivo da tempada, tanto polo número crecente de persoas que se achegan a coñecer o proxecto como pola calidade das propostas.
O Eido Dourado recibiu durante os verán a visita dunhas 2.000 persoas, cifra semellante á do ano 2014: “foi un verán realmente excepcional, moveuse unha cantidade de xente moi importante. As visitas seguen a tónica dos últimos anos, cando máis hai é cando fai mal tempo. Neste verán por sorte tivemos moi bo tempo excepto agora en agosto, que foi cando máis visitas houbo”. Os eventos do solpor dos domingos nos xardíns do Eido reúnen, pola súa banda, entre 200 e 250 persoas cada noite.
Dourado asegura que son varios os elementos que fan do Eido un proxecto atractivo para os visitantes: “o Eido Dourado chama por varias cousas a atención da xente. Hai moitos de fóra que mesmo se achegan a preguntar que é aquilo. Chama a atención a edificación en si mesma, é unha edificación en pedra con moita madeira e cristal. Tamén o lugar, porque estamos enclavados a carón da praia da Pasada, polo cal o paseo marítimo que discorre por diante desta edificación é un reclamo turístico importante. E como non, dentro, as pinturas, a miña produción plástica que alí se expón, e logo os xardíns, que os domingos son usados para diferentes actividades dentro do eido cultural”.
“O balance é moi positivo, así como no tocante á exposición o número de visitas consolidouse nunhas cifras moi aproximadas un ano tras outro, os concertos cada ano van a mais. Estou ampliando constantemente o número de cadeiras, mesmo adecuando os xardíns para que os concertos e actividades sexan o máis cómodas posible”, apunta Celso Dourado.
Os Concertos ao Solpor das noites dos domingos, de balde, no xardín do Eido consolídanse ano tras ano como unha cita cultural de primeira orde na comarca: “este ano debido a que tivemos unhas noites magníficas o número de visitas foi moi importante. Empezamos en xullo cunhas pezas teatrais da man do gran dramaturgo da Mariña e de Galicia que é Manuel Lourenzo, ao cal acudiron preto de 200 persoas. A partir de aí foi a sinal de comezo destas actividades, iniciamos o ciclo de Concertos ao Solpor, coa caída do sol. O número foi continuamente in crescendo dende o 26 de xullo, que actuou Vai Trío, un grupo folk dunha calidade inmensa, ata logo o proxecto de Yukhnevich e Cupeiro, Compromiscuo. Eu asistín ao nacemento do proxecto e mesmo á rodaxe do videoclip Baleas e, dalgunha maneira presentámolo cara a Mariña aquí, este verán. Pasou tamén unha voz excepcional que descubrín por casualidade e cando indaguei, -estou a falar de Sara de Sousa, compoñente e voz do grupo Falúa- dinme conta de que estamos diante dunha persoa cunhas dotes impresionantes. Sara de Sousa é unha persoa con raíces importantes no veciño Portugal, tremendamente coñecida en Oporto, onde estivo varios anos actuando en todos os sitios, cantando dende fados a cancións propias dela. Deu a casualidade de que Sara estaba vivindo neses intres en Santiago e trouxémola ao Eido Dourado. Foi unha noite realmente magnífica”.
Celso Dourado lembrou que “rematamos o 16 de agosto co que está considerado o grupo de jazz por excelencia de Galicia e dos grupos máis imaxinativos de jazz, máis innovadores, do estado español. Estou falando de Sumrrá. Aí si que superamos todas as previsións. Malia que anunciaban auga non choveu e os xardíns enchéronse, realmente non collíamos dentro, foi incrible a capacidade de convocatoria deste grupo. A noite foi realmente máxica, eles mesmos saíron tremendamente ledos e repetiron algunha das pezas porque o publico así o demandaba”.
O proxecto ten futuro e, dado o éxito, Dourado pretende amplialo: “estou realmente moi motivado a continuar con este ciclo musical e para o ano mesmo pretendo amplialo e dótalo doutros argumentos que fagan posible que isto teña unha continuidade. Estamos pensando mesmo facer unha serie de concertos moi sentidos no xardín zen. Creo que vai ser realmente sorprendente porque nos axudarán moito a iluminación e os efectos que alí se dan. É un espazo cerrado sobre si, onde a música, que xa probamos, soa dun xeito especial”.
O que non cambiará é o espírito do Eido Dourando: “a filosofía que a min me alimenta para realizalos é buscar aquelas musicas diferentes e diferenciadas que poden ter cabida nun espazo coma este. Realmente os resultados son moi motivantes. Esperamos seguir nesta liña”.
Un grupo de nenos e nenas de Barreiros participaron onte no pavillón municipal na actividade Ponlle as pilas ao teu bocata, organizada polo Concello en colaboración coa Consellería de Medio
Rural e do Mar, a Consellería de Cultura, Educación e Ordenación Universitaria, a Consellería de Sanidade e Anfaco-Cecopesca. “O obxectivo pasou por poñer en valor as múltiples virtudes das conservas de produtos do
mar, o seu valor como fonte de enerxía, unha enerxía asociada á forza, vitalidade e crecemento”, segundo explican desde o Concello barreirense. Os nenos e nenas coñeceron todas as posibilidades que ofrecen as conservas tanto no ámbito alimenticio, como no didáctico e lúdico. Os rapaces gozaron de actividades informativas, xogos e, sobre todo, a realización e degusttación de bocatas.
Vadim Yukhnevich e Abraham Cupeiro encheron de ritmo e de arte os xardíns do Eido Dourado na noite de onte, domingo. Alí presentaron o seu traballo Compromiscuo, unha mestura de sons balcánicos coa tradición celta. Os asistentes puideron gozar de instrumentos casi desaparecidos como é o caso do carnyx. O concerto enmarcouse dentro da programación cultural prevista para este verán polo Eido Dourado, sito a carón da praia barreirense de A Pasada.
O EIDO DOURADO ACOLLE ESTE DOMINGO, 2 DE AGOSTO, A PRESENTACIÓN DO DISCO COMPROMISCUO, DE VADIM YUKHNEVICH E ABRAHAM CUPEIRO. TRÁTASE, SEGUNDO CELSO DOURADO, DUNHA MESTURA DE SONS BALCÁNICOS COA TRADICIÓN CELTA.
Barreiros, 29 de xullo de 2015. O Eido Dourado ofrecerá este domingo, 2 de agosto, un novo concerto dentro da súa programación estival. Trátase da presentación do disco Compromiscuo, un traballo conxunto dos músicos Vadim Yukhnevich e Abraham Cupeiro. A cita terá lugar ás dez da noite e a entrada será gratuíta.
Celso Dourado, impulsor deste espazo cultural, recalcou a calidade desta nova aposta musical: “no Eido Dourado sempre procuramos traer aquelas propostas que aporten algo ao panorama actual. Neste caso presentase o disco Compromiscuo, que corresponde a dous grandísimos músicos, o bielorruso Vadim Yukhnevich e o galego Abraham Cupeiro. Fan unha mestura realmente moi interesante de ritmos de orixe balcánica da Europa do Leste cunha fonda tradición celta. Recordamos que Abraham é un gran lutier, é un gran músico investigador, e reproduce instrumentos case desaparecidos como é o caso do carnyx. De aí que saquen un produto moi pero que moi interesante. Fan unha especie de escenografía con todos estes instrumentos que resulta realmente marabillosa. Estiveron facendo promoción do disco en Madrid e foi todo un éxito dada a orixinalidade do proxecto”.
O artista barreirense anima aos veciños e visitantes da comarca a achegarse pola praia da Pasada, en Barreiros, e pasar un anaco gozando da música: “debido unha vez mais á amizade que me une con eles van presentar o disco no Eido Dourado con toda a súa amplitude. A entrada é libre e gratuíta e aquelas persoas que desexen escoitar unha nova proposta están invitados a este espectáculo. Espero que o tempo nos axude e que saia unha noite fermosa. Merece a pena pola singularidade da proposta e ao mesmo tempo polos instrumentos realmente orixinais e pintorescos aos que Abraham Cupeiro lles fai sacar uns sons impresionantes”.
Os xardíns do Eido Dourado, en Barreiros, enchéronse onte á noite para disfrutar da música de Vai Trío, “uns músicos que formaron parte doutros grupos como Luar na Lubre ou Fía na Roca”, segundo explicou o artista barreirense Celso Dourado. O bo tempo acompañou neste novo evento, enmarcado na programación cultural do Eido Dourado para este verán.
O pavillón polideportivo de Barreiros acolleu o luns a actividade O sabor da aventura está no mar. Trátase dunha campaña deseñada pola Consellería do Medio Rural e do Mar, que contou coa colaboración das de Cultura, Educación e Sanidade e tamén Anfaco-Cecopesca e o Concello de Barreiros. O obxectivo “foi poñer en valor unha das múltiples virtudes das conservas de produtos do mar: o seu valor como fonte de enerxía. Unha enerxñia asociaciada á forza, á vitalidade, ao crecemento e tamén ao xogo e á diversión”. A actividade resultou divertida e entretida para todos os rapaces e rapazas que asistiron.
Barreiros |
Mariña Patrimonio viene de solicitar al Servizo de Patrimonio de la Xunta de Galicia la inclusión da turbeira de Arealonga, San Miguel de Reinante, en Barreiros. Piden que se realice un inventario de los yacimientos arqueológicos, tras la aparición de una cornamenta de ciervo y otros restos óseos de fauna que habitó en el lugar hace unos 8000 anos.
Mariña Patrimonio considera necesaria que la Xunta incluya este lugar como yacemento para que sea debidamente protegido y se evite cualquier acción que pueda dañar la turbeira o os restos que conserva.
Ver tamaño real: http://galeria.benquerencia.info/main.php?g2_itemId=25861
CUNHA REPRESENTACIÓN TEATRAL DE MANUEL LOURENZO ARRINCA ESTE DOMINGO, 19 DE XULLO, A PROGRAMACIÓN CULTURAL DO EIDO DOURADO PARA ESTE VERÁN.
Barreiros, 15 de xullo de 2015. O vindeiro domingo, 19 de xullo, arrinca a programación cultural do Eido Dourado, en Barreiros. Será unha representación teatral a cargo do mariñán Manuel Lourenzo, segundo deu a coñecer no día de hoxe o artista Celso Dourado.
Dourado explicou que “esta tempada vai arrincar o domingo, 19 de xullo, a partir das 22 horas nos xardíns do Eido Dourado, cunha representación teatral a cargo de Manuel Lourenzo, que é unha personalidade sumamente coñecida dentro da escena teatral. A obra que vai representar está promovida polo club de teatro Elsinor e leva por título A técnica do taratantanleo. Podemos dicir que é unha transición no mundo de Otero Pedrayo o cal é un referente, está interpretada e dirixida por Manuel Lourenzo e conta coa colaboración de Xosé Martínez, autor da gravación audiovisual, e producido por Montserrat Modia”.
Sobre Manuel Lourenzo subliñou que “é un home dunha longa traxectoria teatral, creador de diferentes agrupacións de teatro como O Facho, Teatro Circo, estudoso, escritor de distintas publicacións dedicadas ao mundo do teatro. No 1979 publica a monografía O teatro galego, un libro referente e pioneiro dentro da escena teatral, no ano 1980 crea a compañía teatral Luís Seoane, dunha fonda traxectoria, en 1990 crea o club de teatro Elsinor, alá polo ano 1997 recibe o Premio Nacional de Literatura Dramática por Verdades indecentes. Estamos a falar do que posiblemente sexa o maior autor teatral de Galicia. A partir de aí, no 1998, crea xunto a Santiago Fernández a Escola Teatral Casa Hamlet, unha escola libre de Teatro, radicada na Coruña e formadora de cantidade de autores”. Celso Dourado considera que “é un luxo para A Mariña contar cun veciño como Manuel Lourenzo, que é nado en Ferreira do Valadouro e sempre pasa aquí os veráns”.
A entrada a esta representación teatral é libre e gratuíta, “unha aposta máis polo mundo da cultura, o teatro, que creo que dentro do que é a programación habitual do Eido Dourado non estaba suficientemente representado, e imos esbozar este pequeno proxecto o vindeiro domingo. Convido aos que están por estas terras a que acudan a arroupar a este grande da escena galega”.