ALFONSO-FUENTE-PARGA BARREIROS

Alfonso Fuente Parga. JOSÉ Mª ÁLVEZ

É un dos alcaldes máis lonxevos hoxe en día na Mariña, con case 14 anos no goberno barreirense. Cando foi encausado por un asunto urbanístico, aínda pendente de resolución nos xulgados, deuse de baixa no partido, para que o asunto non lles afectara aos seus. Sente paixón pola política, pero non desatende a súa profesión e a súa asesoría

O REXEDOR barreirense, Alfonso Fuente Parga (PP), calcula que debe estar case empatado co de Cervo, Alfonso Villares, en longa duración á fronte dunha alcaldía na Mariña e, máis ao menos, está á par que Fernando Suárez en Ribadeo e que Demetrio Salgueiro en Xove. É moi consciente de que os tempos cambian e con eles aparecen novas necesidades. Iso si: as épocas das obras faraónicas remataron e os concellos fan reformas “como as que un pode ir facendo pouco a pouco na súa casa”.

Que retos se marca?
O Concello ten que ser unha administración activa e polo tanto aspiramos a ter tódolos servizos que poidamos. Traballamos en ter no mellor estado posible a rede viaria municipal, que é moi extensa, utilizando aglomerado asfáltico. Aparte, nas praias e nas vías que baixan aos areais, coidamos de contar con boa iluminación.

Na súa opinión, cal ten sido a obra que máis vida lle deu a Barreiros?
Unha das que máis vida lle deu foi a chegada da Autovía do Cantábrico (A-8) ao municipio. O feito de poder collela ou ter accesos en Barreiros é moi importante. E hai unha área de servizo prevista ademais xusto ao seu paso pola localidade, aínda sen uso. Non sei se hai sequera un proxecto en firme para instalar nela gasolineira, pero gustaríame ver esa superficie activa porque pode xerar emprego entre os barreirenses e ser un miradoiro moi bo sobre a nosa costa e a de Foz.

Que actuación lle gustaría ver executada canto antes?
A depuradora de San Miguel de Reinante, pola que levamos pelexado moito tempo. Supón un custo de catro millóns de euros, é moito para un Concello e gustaríanos que neste ano puidésemos ver parte dos trámites avanzados por parte da Xunta de Galicia. Por exemplo, poder ver que sacan a concurso a fase inicial da actuación, polo menos. Xa sabemos que para este verán será imposible, pero canto antes mellor.

Non só temos praias, senón paraxes interiores de enorme beleza como a de Santo Estevo do Ermo e a súa fervenza

Polo que respecta á mellora dos servizos, ten previsto unha inauguración en breve, non si?
En efecto, imos inaugurar axiña a nova depuradora de auga de Celeiro de Mariñaos. É un depósito cabeceira, o de San Caetano, que abastece a todo o municipio. Adxudicouse nun millón de euros e dispor desta instalación vai supoñer un respaldo, estar máis tranquilos no caso de que fallara o servizo.

A poboación aumenta no verán. Supón iso un problema para o subministro de auga?
Estes anos non tivemos problemas de abastecemento e a verdade é que nunca chegou pasar algo preocupante ou grave.

Barreiros vai seguir medrando?
Si, cambiou o ritmo de crecemento, pero non está parado. Falábase de que Barreiros, cuns 3.000 habitantes, ía pasar a ter uns 10.000 polo crecemento. Basta con ver que o pasado verán nos visitou e vivir aquí temporalmente máis xente. Unhas 12.000 personas quizais, se nos baseamos nos contadores de auga instalados. E a maiores habería que contabilizar a xente dos cámpings.

E por que crece o interior?
Está en crecemento polo Camiño Norte de Santiago e por ser parada da ruta do mar. Por iso se fixeron melloras nos albergues de Gontán e San Xusto, porque é unha ruta en auxe. Hoxendía hai dous locais de hostalería na zona interior, que manteñen empregos grazas a este tránsito. Ademais, non só temos praias, senón paraxes interiores de enorme beleza como a de Santo Estevo do Ermo e a súa fervenza.

Que é o que atrae de Barreiros?
A nosa raxa costeira de oito kilómetros de costa e de praias. Cando chega o verán todo o mundo quere desfrutar deste espazo. Hai boas zonas para aparcar, chégase sinxelamente porque está a apenas 50 minutos de Lugo ou a pouco máis dunha hora de Oviedo, que fai posible que os que veñan poidan marchar á noite. Ademais estamos atravesados polos trens turísticos e unha parte da localidade está dentro do lugar de interese comunitario das Catedrais.

Como evitar que por exemplo Arealonga sexa un pedregal?
Habería que debater se un está disposto a converter unha praia natural en urbana con, por exemplo, un espigón de formigón que impida o efecto das mareas. Eu prefiro prescindir dun kilómetro de area mentres siga sendo salvaxe.

MOI PERSOAL
“Agardo que se celebre o xuízo por urbanismo canto antes”

É unha lousa o xuízo pendente pola concesión de licencias?
Nós obramos correctamente, segundo os informes favorables que tiñamos enriba da mesa. Por iso estamos tranquilos, pero eu persoalmente desexo que este trámite pase canto antes. Gustaríame telo pasado en febreiro, pero aprazouse pola folga na Xustiza e agardo que se celebre este ano.

Que supón esta incertidume?
O feito de estar máis de dez anos pendente dun xuízo é esgotador para calquera e máis sabendo que era o que tiñamos que facer para levar adiante uns informes favorables. Hai moitos veciños preocupados por esta situación.

O feito de estar máis de dez anos pendente dun xuízo é esgotador para calquera e máis sabendo que era o que tiñamos que facer

Hai aínda edificios inacabados?
Houbo esqueletes de ladrillo, pero é que, aínda que os haxa hoxe en día, iso non ten que ver coa concesión de licenzas, senón co parón da construción.

Despois de dez anos, que pasou cos servizos en Barreiros?
Despois de dez anos, os servizos deron abasto. Máis de 3.000 contadores se conectaron á rede, todas esas vivendas tiveron tamén luz, moitas casas se remataron e aínda hai demanda.

Como logra desconectar?
O político local está en permanente contacto cos veciños, non hai vacacións; o teléfono non se apaga, pero non concibo a política coma un traballo, desfruto do que fago. Un é político porque lle gusta estar. Na miña familia sempre foron hostaleiros, criáronme debaixo dun mostrador e eu teño unha asesoría. E non podes descoidar a profesión. Son fiscal e contable e tamén iso me gusta.

Curiosidades
Os barreirenses prefiren unha vellez na casa

“Queremos morrer na nosa casa por moi duro que resulte dicilo”, sinala o alcalde, Alfonso Fuente, que cada ano comproba que os veciños prefiren atención domiciliaria, no canto de ter que ingresar nunha residencia. “A xente que está nos xeriátricos, por moi ben atendida que estea, bota de menos os veciños e ese foi o meu obxectivo desde que cheguei á alcaldía, que todo o mundo puidera estar o maior tempo posible na súa casa”. De feito, está convencido de que “a hospitalización domiciliaria ten dado mellores resultados que a dos centros”.

60 usuarios
Barreiros vén de asinar un plan concertado de axuda domiciliaria da que poderán beneficiarse ao redor de 60 persoas, cunha vintena de coidadores que percorren a diario decenas de quilómetros para atender os maiores. “Dos tres millóns de euros que pode ter un orzamento municipal, este servizo supón máis de 600.000, dos que 100.000 euros os achega o Concello”, engade o alcalde.

AO PLENO QUE SE CELEBRARÁ NO CONCELLO BARREIRENSE O VINDEIRO MÉRCORES, 25 DE ABRIL, IRÁN ASUNTOS COMO UN PLAN DE AXUSTE E O PLAN CONCERTADO QUE, EN PALABRAS DO ALCALDE, É A BASE DOS SERVIZOS SOCIAIS QUE SE PRESTAN NUN CONCELLO. FUENTE PARGA NON ENTENDE AS CRÍTICAS EFECTUADAS POLOS PARTIDOS DA OPOSICIÓN NOS ÚLTIMOS DÍAS.

Barreiros, 23 de abril de 2018. O Concello celebrará pleno este mércores, 25 de abril, ás 19:30 horas, para aprobar o plan de axuste e o plan concertado. Este último é a base dos servizos sociais que se prestan en Barreiros, segundo o seu alcalde, Alfonso Fuente. O rexedor declara que o seu custe ascende a 650.000 euros anuais, dos que só 190.000 euros chegan procedentes das subvencións concedidas pola Xunta de Galicia e pola Deputación de Lugo. Fuente Parga engade que neste 2018 tamén se realizarán obras en estradas, rúas e alumeados, entre outros.

O alcalde de Barreiros manifestou que “lendo a información que estes días víamos por parte da oposición, que mandaban aos medios de comunicación, me sorprende porque parece que no pleno do vindeiro mércores só se vai aprobar o plan de axuste. Un plan de axuste que eu vou falar del, e tamén vou falar do plan concertado porque nesta información non se fala en ningún momento, a oposición parece que non quere falar da solicitude do plan concertado”.

Alfonso Fuente declarou que “o plan de axuste se debe a unha serie de investimentos que xa se realizaron en anos anteriores e por iso hai que axustar e rebaixar a parte que se dedica a investimentos. A parte que se dedica a investimentos, con fondos propios, se vai rebaixar en 60.000 euros. Isto se debe a que durante varios anos nos que gobernou o bipartito na Deputación, falo de PSOE e BNG, cando o vicepresidente da Deputación Provincial era o concelleiro do BNG neste Concello, Antonio Veiga Outeiro, o Concello de Barreiros recibía da Deputación en torno a 25.000 euros ao ano para facer obras”.

O rexedor dixo que “agora, presionado e porque ten que consensuar o Partido Socialista co Partido Popular na Deputación, pasamos todos os Concellos a recibir unhas cantidades importantes que destinamos a investimentos. Concretamente no Concello de Barreiros estamos a recibir en torno a uns 240.000 euros para investimentos no noso concello, que veñen, como en todos os Concellos, do que a Deputación Provincial recada para distribuír entre todos nos”.

Para o alcalde barreirense “se pode falar de que o Concello de Barreiros, igual que outros Concellos, tiñan unha débeda histórica por parte da Deputación, e sobre todo mentres gobernou o bipartito, entre eles o vicepresidente que era concelleiro neste Concello, xa que Barreiros non recibía e que agora recibe. Polo tanto o que facemos é sacar esa partida de 60.000 euros de investimentos reais dos fondos propios, é dicir, dos cartos dos veciños e veciñas, precisamente para destinar a outros investimentos e outros gastos correntes que necesitan e que están a demandar os veciños de Barreiros. Digo isto porque só se fala do plan de investimentos e non se fala nada do plan concertado que tamén vai ao pleno do mércores”.

Fuente Parga subliñou que “o plan concertado é polo cal se manteñen todos os servizos sociais do concello, é dicir, tanto axuda no fogar, tanto de libre concorrencia como de dependencia, son todos eses servizos que se prestan á xente maior, aos nosos veciños nas casas, nos cales todos os días os visita unha persoa para facerlles os coidados e o mantemento, e que poidan seguir vivindo nos seus domicilios”.

O rexedor indicou que “por outro lado está a gardería infantil na que contamos con 40 nenos e nenas e onde hai un persoal atendendo, que é unha envexa doutras moitas garderías. Pero esta é unha gardería municipal que mantén o Concello de Barreiros, e que outros concellos coa mesma poboación que ten Barreiros non contan con ese servizo, iso non se di. Non se fala de que no pleno do mércores tamén se vai debater ese plan concertado para manter en servizo tanto o SAF (Servizo de Axuda no Fogar) como a gardería, que ao Concello de Barreiros lle custan en torno a 650.000 euros, que se di moi pronto. É verdade que recibe unha subvención por parte da Xunta de Galicia e da Deputación que non suman máis que 190.000 euros, o resto 400.000 euros, son os que ten que poñer o Concello de Barreiros para soster estes servizos”.

O alcalde de Barreiros declarou que “o que non din estes señores, que poñen o grito no ceo porque sacamos 60.000 euros de investimentos reais, que tamén aí están, se están facendo en estradas. Este ano se van investir outros 200.000 euros en estradas, xa estes días se estiveron aglomerando estradas, facendo regos e traballos nas vías municipais. Vanse facer alumeados e vanse mellorar rúas. Cando falamos de 60.000 euros de investimentos é ben pouco en investimentos de estradas”.

Alfonso Fuente dixo que “o recortamos dos cartos dos veciños de Barreiros porque teñen que vir, e van vir, doutras administracións para facer fronte a eses investimentos. Simplemente é un cambio no presuposto e parece ser que isto o trasladan como se fose unha debacle e realmente é un axuste”.

O rexedorengadiu que “para min o importante do pleno do mércores, é que non se menciona nin unha soa palabra deste tema, é o plan concertado, que é a base dos servizos sociais que se prestan nun Concello, que é un dos servizos máis importantes, gardería, servizo de axuda no fogar, servizo de emerxencia social, é dicir, todas estas cousas que realmente necesitan moitas veces as persoas”.