CANTAR DELAS ACTUARÁ ESTE SÁBADO, 30 DE MARZO, EN SAN COSME DE BARREIROS.

Barreiros, 26 de marzo de 2019. O grupo Cantar delas actuará o vindeiro sábado, 30 de marzo, no centro sociocultural de San Cosme de Barreiros, ás 19:00 horas.

Neste concerto, enmarcado nos actos de conmemoración do 8 de marzo, Día Internacional das Mulleres, Cantar Delas fará un percorrido pola música dende o século XIII ata o XX. Cada letra irá precedida dunha presentación de personaxes femininas que forman parte do imaxinario colectivo e están presentes nas nosas vidas, sen saber en moitos casos quen foron e as razóns polas que pasaron á historia.

Cantar Delas quere dar a coñecer a esas mulleres, o seu papel no cuestionamento da orde social, na loita contra as inxustizas, os motivos polos que foron perseguidas nuns casos, vilipendiadas ou incomprendidas noutros. Deste xeito reivindica ás mulleres que abriron camiño ao longo dos séculos e que posibilitaron chegar a onde hoxe estamos, lonxe aínda da igualdade real pero camiño dela.

Este concerto está organizado pola Deputación de Lugo coa colaboración do Concello de Barreiros.